ڈاکٹرغلام مصطفی بڈانی
ڈسکہ،باغی ٹی وی (نامہ نگارملک عمران) ڈسکہ کے قصبہ منڈیکی گورائیہ میں ایک انتہائی افسوسناک واقعہ پیش آیا ہے، جہاں معمولی غفلت اور لاپرواہی کے باعث دو کمسن بھائی اپنی جانوں سے ہاتھ دھو بیٹھے۔ پانچ سالہ عبیداللہ اور چھ سالہ ارحم گھر کی چھت پر رکھی ہوئی آٹے والی ایک ناکارہ پیٹی (کنستر) میں دم گھٹنے سے جاں بحق ہو گئے۔ اس المناک خبر نے پورے علاقے کو سوگوار کر دیا اور گھر میں کہرام مچ گیا۔
تفصیلات کے مطابق گھر والوں نے آٹے والی ایک خالی پیٹی کو ناکارہ سمجھ کر چھت پر رکھا ہوا تھا۔ کھیلتے ہوئے دونوں معصوم بھائی اس پیٹی میں داخل ہو گئے اور اتفاقاً پیٹی کا ڈھکن بند ہو گیا۔ اندر بند ہونے کے باعث دونوں کمسن بھائی دم گھٹنے کے سبب موقع پر ہی جاں بحق ہو گئے۔
بچوں کے لاپتہ ہونے پر گھر والے پریشان ہو گئے اور انہیں ہر جگہ تلاش کرتے رہے۔ یہاں تک کہ مساجد میں بھی ان کی گمشدگی کے اعلانات کروائے گئے لیکن ان کی تلاش بے سود ثابت ہوئی۔ بالآخر جب بچوں کی نعشیں اس آٹے والی پیٹی سے ملیں تو گھر میں کہرام برپا ہو گیا۔
اطلاع ملنے پر تھانہ صدر ڈسکہ کی پولیس فوری طور پر موقع پر پہنچی اور دونوں بچوں کی لاشوں کو تحویل میں لے کر سول ہسپتال ڈسکہ منتقل کیا۔ بعد ازاں غم و اندوہ کی فضا میں دونوں کمسن بھائیوں کی نماز جنازہ ادا کی گئی اور انہیں سپرد خاک کر دیا گیا۔ اس دلخراش واقعہ نے پورے علاقے کو گہرے صدمے سے دوچار کر دیا ہے۔
