اوچ شریف،باغی ٹی وی (نامہ نگار حبیب خان) اوچ شریف کے نواحی علاقے عاشق آباد کے قریب کرم واہ نہر میں 20 فٹ گہرا شگاف پڑنے سے نہری بند ٹوٹ گیا، جس کے نتیجے میں سینکڑوں ایکڑ اراضی زیر آب آگئی اور تیار فصلیں تباہ ہوگئیں۔
تفصیلات کے مطابق، پانی کا ریلا قریبی زرعی زمینوں میں داخل ہوگیا، جس سے سینکڑوں ایکڑ پر کھڑی گندم کی تیار فصل مکمل طور پر تباہ ہوگئی، جبکہ متعدد دیہات کے مکین بھی شدید متاثر ہوئے۔ مقامی کاشتکاروں نے اپنی مدد آپ کے تحت شگاف کو پر کرنے کی کوشش کی، مگر پانی کے تیز بہاؤ کے باعث ان کی تمام تر کوششیں ناکام ثابت ہوئیں۔
متاثرہ کسانوں کا کہنا ہے کہ محکمہ انہار کی عدم توجہی کے باعث نہری بند خستہ حالی کا شکار ہو چکے ہیں، اور بروقت مرمت نہ ہونے کے باعث اس قسم کے حادثات آئے روز پیش آ رہے ہیں، جس سے کسانوں کو شدید مالی نقصان اٹھانا پڑ رہا ہے۔
اہل علاقہ کے مطابق، واقعے کی اطلاع فوری طور پر ضلعی انتظامیہ اور محکمہ انہار کو دے دی گئی تھی، مگر کئی گھنٹے گزرنے کے باوجود کوئی بھی متعلقہ افسر یا عملہ موقع پر نہ پہنچ سکا۔ مقامی کسانوں اور دیہاتیوں نے محکمہ انہار کی اس مجرمانہ غفلت پر شدید احتجاج کرتے ہوئے حکومت سے مطالبہ کیا ہے کہ کرم واہ نہر کے حفاظتی بندوں کی فوری اور مستقل بنیادوں پر مرمت کی جائے، متاثرہ کسانوں کو مالی امداد فراہم کی جائے اور غفلت برتنے والے افسران کے خلاف سخت کارروائی عمل میں لائی جائے۔
علاقہ مکینوں نے حکومت سے مطالبہ کیا ہے کہ محکمہ انہار کی ناقص کارکردگی کا نوٹس لیتے ہوئے ان کے خلاف سخت ایکشن لیا جائے تاکہ آئندہ ایسے نقصانات سے بچا جا سکے۔
