ڈاکٹرغلام مصطفی بڈانی
اوچ شریف (باغی ٹی وی، نامہ نگار حبیب خان)تھانہ دھوڑکوٹ کی حدود میں واقع بستی نوناری، موضع نوناری خیرپور ڈاہا میں دل دہلا دینے والا واقعہ پیش آیا جہاں تین نامعلوم مسلح افراد ایک گھر میں گھس آئے اور اندھا دھند فائرنگ کر دی۔ ریسکیو ذرائع کے مطابق حملہ آوروں نے گھر میں موجود 25 سالہ خاتون علینہ زوجہ مزمل کو گردن پر گولی مار کر قتل کر دیا۔ مقتولہ موقع پر ہی دم توڑ گئی۔
واقعے کے بعد تینوں حملہ آور بآسانی فرار ہونے میں کامیاب ہو گئے۔ اطلاع ملتے ہی پولیس فوری طور پر جائے وقوعہ پر پہنچی اور شواہد اکھٹے کرتے ہوئے تفتیش کا آغاز کر دیا۔ پولیس کی ابتدائی رپورٹ میں بتایا گیا ہے کہ حملہ آوروں کی شناخت تاحال نہیں ہو سکی، تاہم انہیں جلد گرفتار کرنے کے لیے کوششیں جاری ہیں۔
دوسری جانب مقتولہ کے لواحقین شدید غم و غصے میں مبتلا ہیں۔ انہوں نے لاش کو اسپتال منتقل کرنے سے انکار کرتے ہوئے قاتلوں کی فوری گرفتاری کا مطالبہ کیا ہے۔ واقعے نے علاقے میں خوف و ہراس پھیلا دیا ہے، جبکہ اہلِ علاقہ نے مطالبہ کیا ہے کہ ملزمان کو فوری گرفتار کر کے کیفرِ کردار تک پہنچایا جائے۔
پولیس نے مقدمہ درج کر کے نامعلوم ملزمان کی تلاش شروع کر دی ہے، جبکہ علاقے میں سیکیورٹی کو مزید سخت کر دیا گیا ہے۔
