الٹا چور کوتوال کو ڈانٹے،وکلاء کی ہڑتال،سائلین خوار،گرفتاریوں کے لئے ٹیمیں تشکیل

0
26

الٹا چور کوتوال کو ڈانٹے،وکلاء کی ہڑتال،سائلین خوار،گرفتاریوں کے لئے ٹیمیں تشکیل

باغی ٹی وی کی رپورٹ کے مطابق صدر ہائیکورٹ بار حفیظ الرحمان نے کہا ہے کہ پنجاب بارکونسل آج صوبے بھرمیں ہڑتال کرے گی، وکلا آج عدالتو ں میں پیش نہیں ہوں گے اور ریلیاں نکالیں گے،جنرل ہاؤس اجلاس میں مذمتی قرارداد اورگرفتار وکلا کی رہائی کا مطالبہ کیاجائے گا،

صدر کے مطابق آج مکمل ہڑتال ہو گی، صرف ایمرجنسی کیسز کو سننے کی اجازت دی جائے گی،وکلاکےعدالتی کارروائی کے بائیکاٹ کے باعث سائلین کوکیسز کی پیروی میں مشکلات کا سامنا ہے،

پنجاب انسٹی ٹیوٹ آف کارڈیالوجی پر حملے میں ملوث وکلا کے خلاف مقدمات درج کرلئے گئے، دھاوے کے بعد پی آئی سی میں سروسز بند ہیں، ڈاکٹروں نے واقعے کیخلاف احتجاجا کام چھوڑ دیا۔وکلا حملے کے بعد پنجاب کے سب سے بڑے دل کے ہسپتال کو خالی کرا لیا گیا، پی آئی سی میں ہر قسم کی سروسز ختم کر دی گئیں، ڈاکٹرز بھی ہڑتال پر چلے گئے، آپریشن کے لیے داخل مریضوں کو گھر بھیج دیا گیا، تشویشناک حالت والے مریضو‌ں کو سی سی یو تھری میں رکھا گیا ہے۔

پنجاب انسٹی ٹیوٹ آف کارڈیالوجی پر وکلا کے حملے کی تحقیقات شروع کر دی گئیں، 250 سے زائد وکلا کے خلاف دو مقدمات درج کئے گئے ہیں، 15 سے زائد کو نامزد کیا گیا ہے۔ مقدمات میں دہشت گردی، سرکاری املاک کو نقصان پہنچانے کی دفعات شامل ہیں۔

سرکاری کام میں مداخلت سے مریضوں کی جان جانے، پولیس اہلکاروں پر تشدد، ہوائی فائرنگ اور پولیس وین کا جلانا بھی مقدمات کا حصہ ہے۔ ایف آئی آر کے متن کے مطابق وکلا نے ہسپتال میں کروڑوں روپے کی مشینری اور املاک کو نقصان بھی پہنچایا۔

دوسری جانب وکلاء کی گرفتاریوں کے لئے ٹیمیں تشکیل دے دی گئی ہیں، جن وکلاء پر مقدمات درج کئے گئے ہیں انکو آج گرفتار کئے جانے کا امکان ہے

Leave a reply