اب کسی اور پر الزام نہیں ، حکومت خود ہی مہنگائی کرنا چاہتی ہے. مہنگائی کا ایک اور ریلا آگیا

لاہور : اب حکومت کسی پر خود ساختہ مہنگائی کا الزام نہیں لگا سکتی ، اطلاعات کے مطابق حکومت نے خود ہی مہنگائی کرکے عوام کو پریشان کردیا ہے . مہنگائی کے سونامی میں ڈوبے عوام کیلئے ایک اور بری خبر آگئی، یوٹیلٹی سٹورز کارپوریشن آف پاکستان نے 300 سے زائد اشیاء کی قیمتوں میں 1 روپےسے 65 روپےتک کا اضافہ کر دیا۔

ذرائع کے مطابق تازہ مہنگائی میں عام استعمال کی چیزیں مہنگی ہوگئی ہیں. یوٹیلٹی سٹور کارپوریشن آف پاکستان کی طرف سے گھی، کوکنگ آئل، مصالہ جات ، ٹوتھ پیسٹ، شیمپو، صابن، چائے کی پتی اور پیمپر سمیت دیگر اشیاء کی قیمتوں میں اضافہ کیا گیا ہے،یوٹیلٹی سٹورز پر مخلتف برانڈز کے درجہ اوّل اور درجہ دوم کے گھی اور کوکنگ آئل 8 روپے سے 34 روپے، مصالہ جات کی قیمتیں 15 سے 25 روپےجبکہ شیمپو 25 روپے تک مہنگے کر دئیے گئے۔

یوٹیلٹی سٹورز کارپوریشن آف پاکستان کے نئے نرخ نامے کے مطابق مخلتف کمپنیوں کے صابن ایک سے 7 روپے اور ٹماٹو کیچپ کی قیمت میں 15 روپےتک کا اضافہ کیا گیا ہے، مختلف برانڈ کے پیمپرز کی قیمت میں 65 روپے جبکہ مصالہ جات 3 روپےاور چائے کی پتی 3 روپے سے 16 روپے تک مہنگی کر دی گئی۔

شہریوں کا کہناتھا کہ یوٹیلٹی سٹورز پر اشیاء کی قیمتوں میں مسلسل اضافہ ہو رہا ہے اور قیمتوں کو کنٹرول کرنے میں حکومت ناکام ہو چکی ہے شہریوں کا مزید کہنا تھا کہ اشیاء کی قیمتوں میں اضافےکے باعث ان سٹورز کی افادیت ختم ہورہی ہے، حکومت یوٹیلٹی سٹورز پر اشیاء کی قیمتوں میں کمی کرے تاکہ عام شہری کو مہنگائی کے اس دور میں کچھ ریلیف مل سکے۔