برازیل میں کورونا وائرس کی ویکسین کے ٹرائل کے دوران رضاکار کی موت،ہلچل مچ گئی

برازیل : برازیل میں کورونا وائرس کی ویکسین کے ٹرائل کے دوران رضاکار کی موت،ہلچل مچ گئی ،اطلاعات کے مطابق عالمی وبا کی وجہ بننے والے نئے نوول کورونا وائرس کا علاج دریافت کرنے کے لیے اس وقت 100 سے زائد ویکسینز کی تیاری پر کام ہو رہا ہے اور صرف 3 ویکسینز آزمائش کے آخری مراحل میں داخل ہوئی ہیں۔

ویکسین کی آزمائش میں معیاری احتیاط اختیار کی جاتی ہے جس کے تحت اس چیز کو یقینی بنایا جاتا ہے کہ ٹرائل میں شامل افراد پر تجرباتی ویکسین کوئی سنگین اثرات مرتب نہ کرے۔

تاہم تمام تر احتیاطی تدابیر اختیار کیے جانے کے باوجود ستمبر میں دوا ساز کمپنی ایسٹرا زینیکا نے رضا کار میں نامعلوم بیماری کی وجہ سے کورونا وائرس کی ویکسین، جسے آکسفورڈ ویکسین کا نام دیا گیا ہے، کا ٹرائل روک دیا تھا۔

رضاکار کی بیماری کی تفصیلات جاری نہیں کی گئی تھی لیکن ایک ہفتے کے تعطل کے بعد ویکسین کا ٹرائل دوبارہ شروع کردیا گیا تھا۔رواں ماہ 12 اکتوبر کو معروف ملٹی نیشنل دوا ساز کمپنی جانسن اینڈ جانسن نے اپنی کورونا ویکسین کے رضاکاروں پر منفی ردعمل کے باعث ویکسین کا آزمائشی مرحلہ روک دیا تھا۔

کمپنی کے مطابق بعض رضاکاروں میں ایک نامعلوم بیماری کی شکایات سامنے آنے کے بعد ویکسین کی آزمائش کو روکا گیا۔اب برازیل میں دوا ساز کمپنی ایسٹرا زینیکا کی تجرباتی کورونا وائرس ویکسین کے ٹرائل کے دوران ایک رضاکار کی موت واقع ہوگئی ہے۔