واسا کے ملازم اب جائیں گے جاپان !!! اہم خبر آگئی

فیصل آباد۔ (اے پی پی) مستقبل میں واسا فیصل آباد کی پیشہ وارانہ صلاحیتوں کو بڑھانے اور واسا افسران کی جدید خطوط پر جاپان میں تربیت کے حوالے سے واسا اور یوکو ہاما واٹر ورکس بیورو جاپان کے مابین مفاہمتی یادداشت پر دستخط کر دیئے گئے ہیں جس کے تحت دونوں اداروں کے حکام ایک دوسرے کے تجربات سے استفادہ کرتے ہوئے فراہمی و نکاسی آب کے نظام کو مزید بہتر بنانے میں ایک دوسرے کی معاونت کریں گے اور اس ضمن میں ترجیحی، سائنسی و تکنیکی بنیادوں پر شہریوں کے مسائل کا ازالہ یقینی بنایا جائے گا۔اس سلسلہ میں گزشتہ رو ز چیئر مین واسا شیخ شاہد جاوید اور منیجنگ ڈائریکٹر واسا فقیر محمد چوہدری نے گزشتہ دنوں جاپان کا کامیاب دورہ بھی کیا ہے جس میں ان کے یوکا ہاما واٹر ورکس بیورو جاپان کے حکام سے مفید مذاکرات بھی ہوئے ہیں۔ واسا کے ترجمان نے بتایاکہ جاپان نے باہمی ٹیکنیکل ایکسپرٹیز کے گورنمنٹ کی سطح پر تبادلہ کی پیش کش بھی کی ہے۔انہوں نے بتایاکہ اس معاہدے کے تحت واسا انجینئرز کی 4رکنی ٹیم جلد 15روزہ ٹریننگ کیلئے جاپان جائے گی جس کے تمام اخراجات یوکوہاما واٹرورکس بیورو برداشت کریگا۔واسا کے حکام نے اپنے دورہ جاپان کے دوران جائیکا ہیڈ کوارٹر کا بھی دورہ کیا اور مستقبل میں 6 ارب روپے کی لاگت جائیکا گرانٹ کے تحت شروع ہونے والے پراجیکٹس کے حوالے سے منعقدہ اعلیٰ سطحی اجلاس میں شرکت کی۔