حمزہ علی عباسی نے شادی کرنے کی اصل وجہ بتادی

لاہور: اداکار حمزہ علی عباسی نے کہا ہے کہ وہ شادی اللہ کو خوش کرنے کیلئے کر رہے ہیں، کچھ لوگ شادی محبت ہوجانے کی وجہ سے کرتے ہیں لیکن وہ شادی اللہ کو خوش کرنے کیلئے کر رہے ہیں.

تفصیلات کے مطابق حمزہ علی عباسی نے اپنے سوشل میڈیا پیغام میں کہا کہ شادی کا اعلان انہوں نے 25 اگست کے بعد ہی کرنا تھا، لیکن چونکہ اب یہ بات پہلے ہی سب کو پتا چل گئی ہے اس لیے وہ بتانا چاہتے ہیں کہ انہوں نے شادی کیوں کی؟ انہوں نے شادی کرنے کی وجہ بتاتے ہوئے کہا کہ ” جب آپ کو پتا چل جاتا ہے کہ یہ دنیا کوئی جادوئی افسانہ نہیں بلکہ ایک حقیقت ہے، اور مرنے کے بعد آپ کو اللہ کے سامنے پیش ہونا ہے، تب آپ دنیا کو تبدیل کرنے کی بجائے اپنے آپ کو تبدیل کرنے کی کوشش کرتے ہیں، پھر آپ دیکھتے ہیں کہ بہت سے ایسے کام ہیں جو آپ کو تو خوش رکھ رہے ہیں لیکن آپ کے رب کو خوش نہیں رکھ رہے. پھر آپ وہ کام ختم کرنے کی کوشش کرتے ہیں، لیکن آپ ناکام ہوجاتے ہیں، اللہ سے بھی مدد مانگتے ہیں کہ اللہ آپ کی مدد فرمائے. بالآخر ایک دن ایسا آتا ہے کہ اللہ آپ کی مدد فرماتے ہیں”

انہوں نے مزید کہا کہ کچھ لوگ شادی محبت ہوجانے کی وجہ سے کرتے ہیں لیکن وہ شادی اللہ کو خوش کرنے کیلئے کر رہے ہیں. ساتھ ہی انہوں نے اپنی اور اداکارہ نیمل خاور کی دوستی کے بارے میں بتایا کہ نیمل اور ان کی دوستی کو 2 سال ہوگئے ہیں. لیکن پھر ایسا ہوا کہ انہوں نے نیمل خاور کو شادی کی پیشکش کی، اور نیمل کو بتایا کہ "ایسی بات نہیں کہ ہم دونوں بوائے فرینڈ اور گرل فرینڈ ہیں، بلکہ اصل بات یہ ہے کہ میں یہ شادی اللہ کو خوش کرنے کیلئے کر رہا ہوں اور نیمل نے حیران کن طور پر یہ پیشکش قبول کرلی”. حمزہ علی عباسی نے شادی کی تاریخوں کا اعلان کرتے ہوئے کہا کہ "25 اگست کو نکاح کی تقریب سادگی سے کی جائے گی اور ولیمہ کی تقریب بھی انتہائی سادگی کے ساتھ 26 اگست کو کی جائے گی، اور پھر ہم دونوں باقی زندگی اللہ کو خوش رکھنے کی کوشش کریں گے”.