’ایف سی پر حملہ کس نے کیا؟اس سے متعلق ابھی کچھ نہیں بتاسکتا:شیخ رشید

طورخم :’ایف سی پر حملہ کس نے کیا؟اس سے متعلق ابھی کچھ نہیں بتاسکتا:اطلاعات کے مطابق وزیرداخلہ شیخ رشید احمد نے کہا ہے کہ ’ایف سی پر حملے میں ٹی ٹی پی، بی ایل ایف، داعش کے ملوث ہونے کے بارے میں کچھ کہنا قبل ازوقت ہے‘

وزیر داخلہ شیخ رشید نے کوئٹہ-مستونگ شاہراہ پر ایف سی کی گاڑی پر حملے کو ’خودکش حملہ‘ قرار دیتے ہوئے کہا کہ حملہ میں پاکستان تحریک طالبان (ٹی ٹی پی)، بلوچ لیبریشن آرمی (بی ایل ایف) اور داعش کے ملوث ہونے کے بارے کچھ بھی کہنا قبل از وقت ہے، خفیہ ادارے تحقیقات کررہے ہیں۔

طورخم بارڈر پر میڈیا سے بات کرتے ہوئے انہوں نے وزیر اعظم عمران خان کا حوالہ دیتے ہوئے واضح کیا کہ ہم اپنی سرزمین کو ہرگز افغانستان کے خلاف استعمال نہیں ہونے دیں گے اور امید رکھتے ہیں کہ افغان سرزمین پاکستان کے خلاف استعمال نہیں ہوگی۔

شیخ رشید نے کہا کہ خطہ سیاسی تبدیلیاں کے ساتھ ترقی کرنے جارہا ہے، افغانستان کا امن، استحکام اور ترقی دراصل ہماری بھی کامیابی ہے۔

ایک سوال کے جواب میں انہوں نے کہا کہ افغانستان میں رونما ہونے والی سیاسی تبدیلی کو تسلیم کرنے والے وزیر اعظم عمران خان ہوں گے، یہ فیصلہ ان کا ہوگا، میں صرف طورخم بارڈر کی ذمہ داری کا جواب دے سکتا ہوں۔

انہوں نے بین الاقوامی میڈیا کو مخاطب کرکے کہا کہ وہ بھارتی میڈیا کے گمراہ کن حقائق کا حوالہ مت دیں، پاکستان میں 4 افغان داخل ہوئے ہیں لیکن اس سے زیادہ یہاں سے وہاں گئے ہیں۔

شیخ رشید نے کہا کہ 10 ہزار پناہ گزینوں میں سے 9 ہزار واپس جا چکے ہیں اس لیے بھارتی میڈیا کس منھ سے پروپیگنڈا کررہا ہے۔

وزیر داخلہ نے امکان ظاہر کیا کہ ’ممکن ہے کہ دنیا میں ایک نیا بلاک بننے جارہا ہو، ہزاروں میل دور موجود لوگوں کے دباو میں تھے، اب یہ خطہ ان کے دباو سے نکلنے جارہا ہے‘۔