fbpx

ورلڈکپ وارم اپ میچ : جنوبی افریقا کے ہاتھوں‌ پاکستان کو 6 وکٹوں سے شکست

ابوظہبی :ورلڈکپ وارم اپ میچ : جنوبی افریقا کے ہاتھوں‌ پاکستان کو 6 وکٹوں سے شکست ،اطلاعات کے مطابق ٹی ٹوئنٹی ورلڈ کپ کے وارم اپ میچ میں جنوبی افریقا نے پاکستان کو 6 وکٹوں سے شکست دے دی۔

ابوظہبی میں کھیلے گئے وارم اپ میچ میں جنوبی افریقی کپتان نے ٹاس جیت کر پہلے فیلڈنگ کا فیصلہ کیا۔

پاکستان نے پہلے کھیلتے ہوئے مقررہ 20 اوورز میں 6 وکٹوں کے نقصان پر 186 رنز بنائے، جواب میں جنوبی افریقا نے 187 رنز کا ہدف 4 وکٹوں کے نقصان پر اننگز کی آخری گیند پر حاصل کرلیا۔پاکستان کی جانب سے فخر زمان نے 28 گیندوں پر 52 رنز کی اننگز کھیلی، ان کی اننگز میں 5 چھکے بھی شامل تھے۔

ان کے علاوہ آصف علی 32 اور شعیب ملک 28 رنز بنا کر نمایاں رہے، قومی ٹیم مقررہ 20 اوورز میں 6 وکٹوں کے نقصان پر 186 رنز بناسکی۔ جنوبی افریقا کی جانب سے ربادا نے 3 وکٹیں حاصل کیں۔187 رنز کا ہدف جنوبی افریقا نے سنسنی خیز مقابلے کے بعد آخری گیند پر حاصل کرلیا۔

جنوبی افریقا کی جانب سے وین ڈر ڈوسن نے 101 رنز کی ناقابل شکست اننگز کھیلی، ان کے علاوہ کپتان ٹمبا باووما نے بھی 46 رنز بنائے۔ پاکستان کی جانب سے عماد وسیم اور شاہین شاہ آفریدی نے 2، 2 وکٹیں حاصل کیں۔

خیال رہے کہ ٹی ٹوئنٹی ورلڈ کپ کے پہلے وارم اپ میچ میں پاکستان نے ویسٹ انڈیز کو 7 وکٹوں سے شکست دی تھی۔

ادھر آئی سی سی ٹی 20 ورلڈ کپ کے آٹھویں میچ میں سری لنکا نے آئر لینڈ کو 70 رنز سے شکست دےکر اگلے مرحلے کیلئے کوالیفائی کرلیا۔بدھ کے روز کھیلے گئے دوسرے میچ میں آئرلینڈ کے کپتان اینڈی بالبر نی نے ٹاس جیت کر سر ی لنکا کو پہلے بیٹنگ کی دعوت دے دی۔

سری لنکانے مقررہ 20 اوورز میں 7 وکٹوں کے نقصان پر 171 رنز اسکور کیے۔سری لنکا کی جانب سے ہاسا رنگا ڈی سلوا نے 71 رنز کی شاندار اننگز کھیلی جبکہ پاتھوم نیسنکا 61 رنز بناکر نمایاں رہے۔آئرلینڈ کی جانب سے جوش لٹل نے 4 کھلاڑیوں کو آؤٹ کیا جبکہ مارک آڈیر نے 2 وکٹیں حاصل کیں۔

172 رنز کے تعاقب میں آئرلینڈ کی پوری ٹیم 19 ویں اوور میں 101 رنز بنا کر آؤٹ ہوگئی اور یوں سری لنکا نے میچ 70 رنز سے اپنے نام کرتے ہوئے اگلے مرحلے سپر 12 کیلئے کوالیفائی کرلیا۔ آئرلینڈ کی جانب سے اینڈی بالبر نی 41 اور کرٹس کیمفر 24 رنز بنا کر نمایاں رہے۔

سری لنکا کے مہیش ٹھکشانا نے شاندار بولنگ کرتے ہوئے 3 کھلاڑیوں کو آؤٹ کیا جبکہ کرونارتنے اور لہیورا کمارا نے 2،2 وکٹیں حاصل کیں۔