زہریلی گیس سے 6 افراد جان کی بازی ہار گئے، 100 سے زائد متاثر

زہریلی گیس سے 6 افراد جان کی بازی ہار گئے، 100 سے زائد متاثر
باغی ٹی وی کی رپورٹ کے مطابق شہر قائد کراچی میں زہریلی گیس کے اخراج سے 6 افراد جان کی بازی ہار گئے جبکہ 100 سے زائد افراد متاثر ہوئے جنہیں طبی امداد کے لئے ہسپتال منتقل کر دیا گیا

پولیس کے مطابق ہسپتال پہنچنے والوں کو سانس لینے میں شدید دشواری کا سامنا ہے۔ گیس کا اخراج کہاں سے ہوا معلوم نہیں ہو سکا، واقعے کی اطلاع ملتے ہی وفاقی وزیر علی زیدی، صوبائی وزیر سعید غنی، سماجی رہنما فیصل ایدھی و دیگر ہسپتال پہنچے اور صورتحال کا جائزہ لیا۔

وفاقی وزیر علی زیدی کا اس موقع پر کہنا تھا کہ نیوکلیئر بایولوجیکل کیمیکل ڈفینس کی ٹیم نے تحقیات شروع کر دی ہیں، زہریلی گیس کہاں سے آئی جلد معلوم ہوجائیگا۔

زہریلی گیس سے متاثرہ افراد کا کہنا ہے کہ بندرگاہ پر کسی بحری جہاز سے کیمیکل نکالنے کے دوران ہوا میں گیس شامل ہوئی۔ ترجمان کے پی ٹی کے مطابق پورٹ پر کوئی ایسا جہاز نہیں لگا جس سے بو پھیلی ہو، تمام متاثرہ افراد کو روڈ سے اٹھایا گیا، پورٹ پر بو پھیلنے کی کوئی اطلاع نہیں جبکہ ہسپتال انتظامیہ کا کہنا ہے کہ متاثرہ افراد کے نمونے حاصل کر لئے ہیں جن کے مختلف ٹیسٹ کئے جائیں جس سے معلوم ہوسکے گا کہ کون سی گیس ہے جس سے اتنے لوگ مثاثر ہوئے۔

پولیس کی جانب سے بھی معاملے کی تحقیقات شروع کر دی ہیں، زہریلی گیس سے متاثرہ تین افراد آئی سی یو میں داخل ہیں جبکہ ایک شخص وینٹی لیٹر پر وارڈ میں زیر علاج ہے. گیس سے متاثرہ افراد کے لواحقین بھی ہسپتالوں میں پہنچ چکے ہیں، ہسپتال میں ایمرجنسی نافذ کی گئی ہے اور متاثرہ افراد کا علاج جاری ہے.

جواب چھوڑیں

آپ کا ای میل ایڈریس شائع نہیں کیا جائے گا.