مولانا فضل الرحمان کا وفاقی شریعت عدالت کے سودی نظام کے خلاف اپیلوں کی جلد نمٹانے کا مطالبہ

اسلام آباد: جمعیت علماء اسلام (جے یو آئی) کے سربراہ مولانا فضل الرحمان نے وفاقی شریعت عدالت کے سودی نظام کے خاتمے کے فیصلے کے خلاف بینکوں کی دائر کردہ اپیلوں کو جلد نمٹانے کا مطالبہ کیا ہے۔مولانا فضل الرحمان نے چیف جسٹس آف پاکستان، قاضی فائز عیسیٰ کے نام ایک خط میں اس بات پر زور دیا کہ وفاقی شریعت عدالت نے گزشتہ سال اپنے فیصلے میں حکم دیا تھا کہ ملک کا مالیاتی نظام پانچ سال کے اندر سود سے پاک کیا جائے۔ انہوں نے کہا کہ اس فیصلے کے خلاف مختلف بینکوں کی اپیلیں زیر التوا ہیں اور ان کو جلد از جلد نمٹایا جانا چاہیے تاکہ عدالت کا فیصلہ عملی طور پر نافذ ہو سکے۔مولانا فضل الرحمان نے حکومت سے بھی مطالبہ کیا کہ وہ سود سے پاک مالیاتی ڈھانچے کی تشکیل کے لیے عملی اقدامات کرے۔ اس کے علاوہ، خط میں مولانا فضل الرحمان نے ختم نبوت ﷺ کے حوالے سے چیف جسٹس کے حالیہ مختصر فیصلے کی تعریف کی اور کہا کہ تفصیلی فیصلہ جلد جاری کرنے سے مسلمانوں میں مکمل اطمینان پیدا ہوگا۔