سیالکوٹ،باغی ٹی وی (بیوروچیف شاہدریاض) مہنگا گوشت اور اشیائے خورونوش فروخت کرنے والوں کے خلاف کریک ڈاؤن، مقدمات درج
ضلعی انتظامیہ نے مہنگے داموں چکن، مٹن، بیف اور دیگر اشیائے خوردونوش فروخت کرنے والوں کے خلاف سخت کارروائی کرتے ہوئے 3 دکانداروں پر مقدمات درج، 2 دکانیں سیل کر دیں جبکہ متعدد کو بھاری جرمانے کیے گئے۔
ایڈیشنل ڈپٹی کمشنر جنرل ایوب بخاری اور اسسٹنٹ کمشنر انعم بابر نے لہائی بازار، پرانی گندم منڈی اور اگوکی میں 43 دکانوں کی انسپکشن کی۔ کارروائی کے دوران 5 پولٹری شاپس، 5 مٹن و بیف شاپس، 2 دودھ فروشوں اور 2 سبزی فروشوں پر مجموعی طور پر 1 لاکھ 76 ہزار روپے جرمانہ عائد کیا گیا۔
ایڈیشنل ڈپٹی کمشنر جنرل ایوب بخاری نے کہا کہ گراں فروشی کی روک تھام کے لیے منظم کریک ڈاؤن کا آغاز کر دیا گیا ہے اور ضلعی انتظامیہ نے خصوصی حکمت عملی مرتب کر لی ہے۔ ان کا کہنا تھا کہ ڈپٹی کمشنر کی ہدایت پر پرائس مجسٹریٹس کو سخت ہدایات دی گئی ہیں کہ صارفین کو مقررہ نرخوں پر اشیاء کی فراہمی یقینی بنائی جائے۔
انہوں نے عوام سے اپیل کی کہ اگر کسی بھی دکاندار کی جانب سے ناجائز منافع خوری کی جائے تو فوری اطلاع دیں، سخت کارروائی عمل میں لائی جائے گی۔
