اوچ شریف (باغی ٹی وی، نامہ نگار حبیب خان) چیف آفیسر بلدیہ احمد پور شرقیہ عدنان فرخ نے سرکاری چھٹی کے باوجود اپنی انتظامیہ کے ہمراہ شہر کے مختلف علاقوں کا اچانک دورہ کیا اور صفائی و سیوریج کے مسائل کا جائزہ لیا۔ دورے میں سب انجینئر ملک محمود اقبال، خواجہ سید فہیم رضا، محمد اکبر خان اور طاہر خان بھی شامل تھے۔
چیف آفیسر نے راؤ کالونی میں سیوریج کے نکاسی آب کے جاری کام کا معائنہ کیا اور علاقہ مکینوں کو یقین دلایا کہ جلد ہی ان کی مشکلات کا ازالہ کر دیا جائے گا۔ انہوں نے بتایا کہ چنگی پیرواہ ڈسپوزل اسٹیشن پر کام آخری مراحل میں ہے اور اس کے مکمل ہوتے ہی شہر کی مرکزی سیوریج لائنوں کی صفائی کی جائے گی، جس سے تمام متاثرہ علاقوں میں نکاسی آب کا مسئلہ حل ہو جائے گا۔
انہوں نے سب انجینئر ملک محمود اقبال کو ہدایت کی کہ ڈسپوزل کے جاری کام کو جلد از جلد مکمل کیا جائے۔ انہوں نے مزید کہا کہ انتظامیہ عوامی مسائل کے حل کے لیے دن رات کام کر رہی ہے اور شہر میں ترقیاتی کاموں کو تیزی سے مکمل کرنے کے لیے تمام وسائل بروئے کار لائے جا رہے ہیں۔
راؤ کالونی کے مکینوں نے چیف آفیسر کے دورے کو سراہتے ہوئے کہا کہ یہ بلدیہ کی سنجیدگی کا ثبوت ہے اور امید ظاہر کی کہ جلد ہی انہیں سیوریج مسائل سے نجات مل جائے گی۔
سرکاری چھٹی کے باوجود انتظامیہ کے افسران کی موجودگی اور مسائل کے حل کے لیے کیے جانے والے اقدامات کو عوامی حلقوں نے خوب سراہا اور اسے بلدیہ کی مستعدی اور عوامی خدمت کا جذبہ قرار دیا۔
