ڈیرہ غازی خان (نیوز رپورٹر شاہد خان)ڈپٹی کمشنر محمد عثمان خالد کی ہدایت پر اسسٹنٹ کمشنر ہیڈ کوارٹر نذر حسین کورائی نے شہر کی مختلف مارکیٹوں میں اچانک چھاپے مار کر پرائس کنٹرول ایکٹ کی خلاف ورزی پر 5 دکانداروں کو گرفتار کرلیا ہے۔ گرفتار ہونے والوں میں تین قصاب، ایک نان بائی اور ایک سبزی فروش شامل ہیں۔
کارروائی کے دوران مہنگے داموں بڑا گوشت فروخت کرنے پر تین قصابوں، کم وزن نان فروخت کرنے پر ایک نان بائی اور خود ساختہ نرخ مقرر کرنے پر ایک سبزی فروش کو حراست میں لیا گیا۔
ڈپٹی کمشنر محمد عثمان خالد نے واضح کیا ہے کہ ضلع بھر میں پرائس کنٹرول ایکٹ پر سختی سے عمل درآمد کرایا جائے گا۔ انہوں نے کہا کہ من مانی قیمتیں وصول کرنے والے کسی صورت قانون کی گرفت سے نہیں بچ سکیں گے اور کسی کو بھی خود ساختہ مہنگائی کی اجازت نہیں دی جائے گی۔
