راولپنڈی: 10 سال سے مطلوب خطرناک اشتہاری ملزم کو انٹر پول کے ذریعے سعودی عرب سے گرفتار کرکے اسلام آباد منتقل کردیا گیا، ملزم کی حوالگی انٹرپول اسلام آباد کی انٹرپول ریاض کے ساتھ قریبی رابطہ کاری کی وجہ سے ممکن ہوئی-
باغی ٹی وی: ایف آئی اے این سی بی انٹرپول نے کارروائی کرتے ہوئے 10 سال سے مطلوب خطرناک اشتہاری ملزم اعجاز اصغر کو سعودی عرب سے گرفتار کر کے اسلام آباد ائرپورٹ منتقل کر دیا ملزم گزشتہ 10 سال سے فیصل آباد پولیس کو مطلوب تھا۔
ملزم کے خلاف 2014ء میں تھانہ ترکھانی فیصل آباد میں مقدمہ درج ہوا تھا ملزم اعجاز اصغر قتل کر کے بیرون ملک فرار ہو گیا تھا بعد ازاں ایف آئی اے این سی بی انٹرپول نے ملزم کی گرفتاری کے لیے ریڈ نوٹس جاری کیا تھا۔
ایف آئی اے امیگریشن اسلام آباد نے ملزم کو پنجاب پولیس حکام کے حوالے کر دیا ترجمان کے مطابق جدید ٹیکنالوجی سے آراستہ این سی بی انٹرپول 24/7 پوری دنیا کے ساتھ رابطے میں ہے ملزمان کی گرفتاری کے لیے تمام تر وسائل کو بروئے کار لایا جا رہا ہے۔
