پاکستان میں پھنسے ہوئے114 بھارتی شہری کل بھارت روانہ ہوں گے

گزشتہ سال کورونا وائرس کی وجہ سے پاک بھارت سرحدیں بند ہونے اورفضائی و ریل سروس بند ہونے کے باعث پاکستان میں پھنسے ہوئے مزید114 بھارتی شہری پیرکے روز واپس اپنے ملک لوٹ جائیں گے۔ بھارتی شہری گزشتہ سال مارچ میں اپنے رشتہ داروں سے ملنے پاکستان آئے تھے اور اب تک واپسی کے منتظر تھے۔ پاکستان میں بھارتی ہائی کمیشن کی طرف سے 114 شہریوں کی فہرست جاری کی گئی ہے جو پیر11جنوری کو واہگہ بارڈر کے راستے واپس اپنے ملک انڈیا جائیں گے۔ اس سلسلے میں واہگہ بارڈر خصوصی طور پر کھولا جائے گا۔ فہرست کے مطابق واپس جانے والے تمام بھارتی شہری مسلمان ہیں اوران میں کئی ایسے ہیں جن کی شادی انڈیا میں ہوئی ہے۔ بھارتی شہریوں کی واپسی کے حوالے سے واہگہ بارڈرپر حکام کو آگاہ کردیا گیا ہے۔2021 میں یہ پہلا گروپ ہوگا جو واہگہ بارڈرکراس کرےگا۔