موریطانیہ، سینیگال، ملائیشیا، عمان، سعودی عرب، قطر سمیت 10 مختلف ممالک سے 48 گھنٹوں کے دوران 139 پاکستانی شہریوں کو بے دخل کر دیا گیا ہے۔ اس دوران کراچی میں 15 افراد کو گرفتار بھی کیا گیا۔
امیگریشن ذرائع کے مطابق، عراق میں غیرقانونی طور پر داخل ہونے اور زائد المیعاد قیام کرنے پر 34 پاکستانیوں کو ملک بدر کیا گیا۔ ان میں سے 2 افراد کو گوجرانوالہ پولیس کے حوالے کیا گیا۔عمان سے 24 پاکستانی شہریوں کو غیرقانونی طور پر ملک میں داخل ہونے پر واپس بھیجا گیا۔ ان میں سے ایک شخص کا نام آئی بی ایم ایس بلیک لسٹ میں شامل تھا، جسے اے ایچ ٹی سی منتقل کیا گیا۔ باقی افراد میں سے ایک کو لاڑکانہ اور دوسرے کو لاہور انتظامیہ کے حوالے کیا گیا۔
سعودی عرب سے 14 پاکستانیوں کو بلیک لسٹ، منشیات، چوری، پاسپورٹ کے بغیر اور دیگر الزامات کے تحت ڈی پورٹ کیا گیا۔ اس دوران انسانی اسمگلنگ کا شکار ہونے سے بچائے گئے 3 افراد کو موریطانیہ اور 2 کو سینیگال سے بے دخل کیا گیا، جنہیں اے ایچ ٹی سی نے حراست میں لے لیا۔متحدہ عرب امارات میں منشیات، چوری، زائد المیعاد قیام، پاسپورٹ گم ہونے اور دیگر الزامات کے تحت 19 افراد سمیت 31 پاکستانی شہریوں کو واپس بھیجا گیا۔
ملائیشیا میں غیرقانونی امیگریشن کے الزام میں 8 پاکستانیوں کو واپس بھیجا گیا۔ اسی طرح، ایتھوپیا کے شہر ادیس ابابا اور قطر سے 9 پاکستانی شہریوں کو رہائشی قوانین کی خلاف ورزی، مفرور ہونے، غیر قانونی کام کرنے اور دیگر الزامات پر بے دخل کیا گیا۔یہ اقدامات غیر قانونی امیگریشن کے خلاف بین الاقوامی سطح پر تعاون اور پاکستانی شہریوں کے تحفظ کے لیے کیے گئے ہیں۔
