چمن بارڈر پر پاک افغان صورتحال میں بہتری کیلئے مقامی سطح پر کوششیں جاری ہیں۔
باغی ٹی وی : مقامی انتظامیہ کے مطابق ممتاز علما، عمائدین اور تاجروں پر مشتمل 16 رکنی جرگہ افغانستان روانہ ہوگیا جہاں افغان حکام سے بات کی جائے گی علماء کرام اور قبائلی عمائدین پر مشتمل جرگہ پاک افغان سرحد پر کشیدگی کم کرنے کے سلسلے میں افغان حکام سے مذاکرات اور بات چیت کریں گے۔
افغانستان جانے سے قبل نجی خبررساں ادارے سے بات کرتے ہوئے جرگہ رکن مفتی قاسم کا کہنا تھاکہ صلح، امن اور دوستی کا پیغام لے کر افغانستان جارہے ہیں، افغان حکام سے رابطوں میں مثبت ردعمل ملا ہے عام شہریوں کا مالی وجانی نقصان کسی کے مفاد میں نہیں۔
ملک عبدالخالق اچکزئی کا کہنا تھا کہ امید ہے مذاکرات اور رابطوں کے نتیجے میں سرحدی تناؤ ختم ہوجائے گا۔
خیال رہے کہ 15 دسمبر کو افغان فورسز کی گولہ باری سے چمن میں ایک شہری شہید اور 15 زخمی ہوگئےتھےجبکہ پاکستانی فورسز کی جوابی کارروائی میں 6 افغان سرحدی پوسٹیں تباہ ہو گئی تھیں اس سے قبل 11 دسمبر کو بھی افغان فورسز کی پاکستان کے شہری علاقوں پر گولہ باری سے 7 افراد شہید اور 17 زخمی ہوگئے تھے۔