گوجرانوالہ،باغی ٹی وی( نامہ نگار محمد رمضان نوشاہی) چوکی فرانسیس آباد پولیس نے بڑی کارروائی کرتے ہوئے ایک منشیات فروش کو گرفتار کر لیا۔ ملزم کے قبضے سے 02 کلو 220 گرام ہیروئن اور رقم و ٹک 2350 روپے برآمد ہوئے۔
سٹی پولیس آفیسر محمد ایاز سلیم کے احکامات پر ایس ایچ او تھانہ صدر گوجرانوالہ انسپکٹر قیصر عباس کی زیر نگرانی انچارج چوکی فرانسیس آباد سب انسپکٹر ابوبکر گورائیہ نے اپنی ٹیم کے ہمراہ گشت و ناکہ بندی کے دوران منشیات فروشی میں ملوث ملزم کو گرفتار کیا۔ گرفتار ملزم کی شناخت افتخار عرف کھارو کے نام سے ہوئی ہے۔ دوران تفتیش ملزم نے انکشاف کیا کہ وہ دوسرے اضلاع سے منشیات لا کر ضلع بھر میں نوجوانوں کو فروخت کرتا تھا۔ ملزم سے مزید تفتیش جاری ہے۔
ملزم کی گرفتاری پر سماجی و سیاسی تنظیموں اور علاقے کے مکینوں نے پولیس کو خراج تحسین پیش کیا۔ سٹی پولیس آفیسر محمد ایاز سلیم نے کہا کہ نوجوان نسل کے محفوظ مستقبل کے لیے منشیات فروشوں کے گرد گھیرا تنگ کرنا ناگزیر ہے۔ انہوں نے اعلیٰ کارکردگی کا مظاہرہ کرنے پر انچارج چوکی سب انسپکٹر ابوبکر گورائیہ اور ان کی ٹیم کو شاباش دی۔
