پاکستان میں پولیو وائرس کے پھیلاؤ میں تشویشناک اضافہ ہو رہا ہے۔ قومی ادارہ صحت (NIH) کی انسداد پولیو لیبارٹری نے کوئٹہ سے پولیو کے ایک اور کیس کی تصدیق کر دی ہے، جو رواں سال کا 18واں پولیو کیس ہے۔ نیشنل ایمرجنسی آپریشن سینٹر (EOC) کے مطابق، یہ کیس بلوچستان میں رپورٹ ہونے والا 13واں پولیو کیس ہے اور کوئٹہ سے اس سال کا دوسرا کیس ہے۔انسداد پولیو لیبارٹری کی رپورٹ کے مطابق، 2 سالہ بچے میں پولیو وائرس کی تصدیق ہوئی ہے۔ اس کیس کی تصدیق کے بعد، وزیراعظم کی فوکل پرسن برائے انسداد پولیو عائشہ رضا فاروق نے اس صورت حال پر گہری تشویش کا اظہار کیا ہے۔ انہوں نے کہا کہ بلوچستان کے بعض علاقوں میں پولیو مہمات میں خلل نے وائرس کے پھیلاؤ کو موقع فراہم کیا ہے۔
عائشہ رضا فاروق نے مزید کہا کہ پولیو وائرس کے پھیلاؤ کو روکنے کے لیے کوششوں کو دگنا کیا جا رہا ہے۔ ان کا کہنا تھا کہ پولیو ویکسین کی متعدد خوراکیں ہر بچے تک پہنچانا بے حد ضروری ہے تاکہ بچوں کو پولیو جیسے موذی مرض سے محفوظ رکھا جا سکے۔ انہوں نے والدین سے اپیل کی ہے کہ وہ اپنے پانچ سال تک کے بچوں کی ویکسینیشن کو یقینی بنائیں اور انسداد پولیو مہم میں بھرپور تعاون کریں۔یہ صورتحال پولیو کے خلاف جاری مہم کے لیے ایک چیلنج بن چکی ہے اور حکام کا کہنا ہے کہ وہ ہر ممکن اقدامات کر رہے ہیں تاکہ اس موذی مرض کے پھیلاؤ کو روکا جا سکے اور پاکستان کو پولیو سے پاک کیا جا سکے۔
Leave a reply
