اسلام آباد: محکمہ موسمیات نے ملک کے مغربی و شمالی علاقوں میں 20 سے 22 دسمبر تک بارش اور برفباری کی پیشگوئی کی ہے۔
محکمہ موسمیات نے ملک بھر میں آنے والے چند دنوں کے موسم کے حوالے سے اہم پیش گوئی جاری کر دی، جس کے مطابق ملک کے مغربی اور بالائی علاقوں میں 20 سے 22 دسمبر کے دوران بارشوں اور برفباری کے امکانات ہیں،مغربی ہواؤں کا سلسلہ 19 دسمبر کو بلوچستان میں داخل ہو گا اس دوران گرج چمک کے ساتھ بارش اور پہاڑوں پر برفباری متوقع ہے، خیبر پختونخوا، گلگت بلتستان اور کشمیر میں بھی 19 اور 20 دسمبر کو بارش ہو سکتی ہے جبکہ بعض مقامات پر شدید برفباری کا امکان ہے۔
چترال، دیر، سوات، پشاور، چارسدہ اور نوشہرہ سمیت مختلف اضلاع میں 19 دسمبر کو بارش متوقع ہے جبکہ اسلام آباد اور راولپنڈی میں بھی تیز بارش کی پیش گوئی کی گئی ہے 20 دسمبر کی رات سے 21 دسمبر کے دوران مری اور گلیات میں تیز بارش اور پہاڑوں پر برفباری کی توقع ہے، سرگودھا، خوشاب، فیصل آباد، حافظ آباد، گوجرانوالہ، سیالکوٹ اور لاہور میں 20 اور 21 دسمبر کو مطلع ابر آلود رہنے کے ساتھ ہلکی بوندا باندی ہو سکتی ہے۔
محکمہ موسمیات نے شہریوں کو محتاط رہنے کی ہدایت کی ہے کیونکہ پہاڑی علاقوں میں لینڈ سلائیڈنگ، سڑکوں کے بند ہونے اور پھسلن کا خدشہ ہے۔
