سال 2020 لالی وڈ کے لئے انتہائی مشکل سال ثابت ہوا

رواں برس عالمی وبا کورونا کے باعث جہاں دنیا بھر میں معاشی بحران پیدا ہوا وہیں پاکستانی شوبزانڈسٹری کے لیے 2020ء انتہائی مشکل سال ثابت ہوا ہے-

باغی ٹی وی :ملک بھر میں لاک ڈاؤن ہوا تو دنیا بھر کی طرح پاکستان میں بھی فلم، ڈرامہ، سنیما اور تھیٹر انڈسٹری بند کرنا پڑی 20 سے زائد فلمیں تیار تھیں لیکن ان کی نمائش نہ ہو سکی چھ سات ماہ کام بند رہنے سے شوبز انڈسٹری سے وابستہ افراد گھروں تک محدود ہو کر رہ گئے شوبز انڈسٹری اربوں روپے کے نقصان سے دوچار ہوئی۔

فروری 2020 میں کورونا کے باعث لاک ڈاؤن، حکومتی پابندیوں اور وائرس کے خوف سے سنیما گھروں اور تھیٹرز بند کر دیئے گئے اور ہر قسم کی شوٹنگز بھی ملتوی کر دی گئیں فیشن شو، اسٹیج ڈرامے، ثقافتی پروگرام، نمائشوں،میوزک، ڈانس، اداکاری سمیت فنون لطیفہ کی دیگر اصناف سیکھنے سکھانے کے عمل سمیت تقریباً تمام ثقافتی سرگرمیاں رکی رہیں۔

رواں برس فلم قائداعظم زندہ باد، زندگی تماشا، لندن نہیں جاؤں گی اور مولا جٹ سمیت 20 سے زائد فلمیں تعطل کا شکار ہو گئیں۔

تاہم سال کے آخر میں آن لائن سرگرمیوں کا آغاز تو ہوا جبکہ لاک ڈاؤن میں نرمی اور کورونا ایس او پیز کے ساتھ شوٹنگز بھی شروع ہو گئیں لیکن سنیما گھر مکمل طور پر بند رہے۔