26 ماہ بعد زرمبادلہ کے ذخائر 9.5 ارب ڈالر سے تجاوز کرگئے

ملک میں مجموعی زرمبادلہ کے ذخائرمیں اضافے کے بعد مجموعی ذخائر 14 ارب 87 کروڑ 31لاکھ ڈالر ہوگئے ہیں۔

باغی ٹی وی کی رپورٹ کے مطابق کے مطابق 26 ماہ بعد پاکستان کے زرمبادلہ کے ذخائر 9.5 ارب ڈالر سے تجاوز کرگئے ہیں، اسٹیٹ بینک کے ذخائر 2.4ار ب ڈالر سے بڑھ کر 9 ارب 53 کروڑ 36 لاکھ ڈالر ہوگئے ہیں۔ پاکستان کے مجموعی ڈالر ذخائر 4 کروڑ 66 لاکھ ڈالر کا اضافہ ہوا ہے، ملک کے مجموعی ذخائر 14 ارب 87 کروڑ 31 لاکھ ڈالر ہوگئے ہیں۔
کمرشل بینکوں کے پاس زرمبادلہ کے ذخائر 2.26 کروڑ ڈالر بڑھ کر 5ارب 33 کروڑ 95 لاکھ ڈالر ہوگئے ہیں۔ دوسری جانب انٹرنیشنل مانیٹری فنڈ (آئی ایم ایف) نے پاکستان کے بیل آؤٹ پیکج کے حوالے سے اعلامیہ جاری کردیا.اعلامیہ میں کہا گیا کہ پاکستان کو ایک ارب ڈالر کی پہلی قسط جاری کردی گئی ہے۔اعلامیے کے مطابق ایگزیکٹیو بورڈ نے پاکستان کے لیے فوری طور پر تقریباً ایک ارب ڈالر کی قسط جاری کر دی گئی ہے اور نیا قرض پروگرام 37 ماہ پر مشتمل ہے۔

آئی ایم ایف نے بتایا کہ پاکستان میں معاشی شرح نمو 2.4 فیصد تک پہنچ گئی ہے جبکہ افراط زر میں بھی کمی واقع ہوئی ہے تاہم پاکستان اب بھی کئی بڑے چیلنجز کا سامنا کر رہا ہے، جن میں مشکل کاروباری ماحول، کمزور حکمرانی، اور محدود ٹیکس بیس شامل ہیں۔اعلامیے کے مطابق نئے قرض پروگرام کا مقصد میکرو اکنامک استحکام کی بحالی اور سرکاری اداروں کی اصلاحات کے ذریعے عوامی خدمات کی فراہمی میں بہتری لانا ہے، اس پروگرام میں بنیادی ڈھانچے کی ترقی اور موسمیاتی تبدیلیوں کے اثرات کا مقابلہ کرنے پر بھی توجہ مرکوز کی گئی ہے۔