لاہور،بادامی باغ پولیس نے ایک بڑی کارروائی کرتے ہوئے لاکھوں روپے مالیت کی سرکاری ادویات اور میڈیکل آلات برآمد کرلیے ہیں۔ اس دوران چار ملزمان کو گرفتار کیا گیا ہے، جو سرکاری دواخانے سے ادوایات چوری کر کے انہیں بازاروں میں فروخت کر رہے تھے۔ ان ملزمان کو دوران چیکنگ خفیہ اطلاع پر گرفتار کیا گیا۔
گرفتار ہونے والے ملزمان کا سرغنہ خالد میو ہسپتال میں سرکاری ملازم اور فارمیسی ٹیکنیشن ہے۔ دیگر ملزمان میں بابر، باقر اور عمران شامل ہیں۔ پولیس کے مطابق ملزمان سرکاری لیبل اتار کر ادوایات کو مارکیٹوں میں بیچتے تھے اور ایک منظم گروہ کی شکل میں سرکاری ہسپتالوں سے ادویات چوری کر کے انہیں دوسرے اضلاع میں فروخت کرتے تھے۔پولیس کے مطابق ملزمان کے قبضہ سے 16 کاٹن برآمد ہوئے ہیں، جن میں مختلف قسم کی ادویات اور میڈیکل آلات تھے، جن کی مالیت لاکھوں روپے بنتی ہے۔ دوران تفتیش ملزمان نے اعتراف کیا کہ وہ میو ہسپتال سے میڈیسن چوری کر کے انہیں فروخت کرتے تھے۔
ایس پی سٹی کیپٹن ریٹائرڈ قاضی علی رضا نے اس کارروائی کو سراہتے ہوئے کہا کہ مستحق عوام الناس کے علاج معالجہ کے لیے آئی سرکاری ادویات پر شب خون مارنے والے عناصر کسی رعایت کے مستحق نہیں ہیں۔ انہوں نے ایس ایچ او بادامی باغ اور سب انسپکٹر عدنان گجر سمیت ٹیم کی بروقت کارروائی کو شاباش دی۔پولیس نے ملزمان کے خلاف مقدمہ درج کر لیا ہے اور مزید تحقیقات جاری ہیں۔
