پاکستان تحریک انصاف (پی ٹی آئی) نے 26ویں آئینی ترمیم کے حق میں ووٹ دینے والے پانچ اراکین قومی اسمبلی کو پارٹی سے نکال دیا ہے۔ اس سلسلے میں باقاعدہ نوٹیفکیشن بھی جاری کر دیا گیا۔
پی ٹی آئی کی جانب سے جاری اعلامیے میں کہا گیا ہے کہ ان اراکین نے پارٹی فیصلے کے برخلاف آئینی ترمیم کی حمایت میں ووٹ دیا، جس پر انہیں پارٹی سے نکالنے کا فیصلہ کیا گیا۔بیرسٹر گوہر کی جانب سے دستخط شدہ نوٹیفکیشن میں بتایا گیا ہے کہ نکالے گئے اراکین میں ظہور قریشی، اورنگزیب خان کھچی، مبارک زیب خان، الیاس چوہدری اور عثمان علی شامل ہیں۔
نوٹیفکیشن میں واضح کیا گیا ہے کہ پارٹی نے 26ویں آئینی ترمیم کی مخالفت کا متفقہ فیصلہ کیا تھا، جس کی خلاف ورزی کرتے ہوئے ان اراکین نے 21 اکتوبر 2024 کو ترمیم کے حق میں ووٹ دیا۔پی ٹی آئی کے مطابق، پارٹی ہدایات کی خلاف ورزی پر ان اراکین کو شوکاز نوٹس جاری کیا گیا تھا، تاہم جواب نہ دینے پر کارروائی کی گئی۔
نوٹیفکیشن میں مزید کہا گیا ہے کہ ان منحرف اراکین کو پارٹی وفاداری اور حلف کی خلاف ورزی پر دوسری جماعت میں شمولیت کی صورت میں نااہلی کا بھی مستحق قرار دیا گیا ہے، اور مطالبہ کیا گیا ہے کہ انہیں قومی اسمبلی کی رکنیت سے بھی نااہل قرار دیا جائے۔
حمیرا اصغر کی موت کیسےہوئی ؟پولیس کی تحقیقاتی ٹیم تشکیل
