میٹا کی زیرملکیت مشہور میسجنگ ایپ واٹس ایپ نے بھارت میں 65 لاکھ واٹس ایپ اکاؤنٹس پر پابندی لگادی۔
واٹس ایپ نے ایڈوانس آئی ٹی 2021 کے تحت بھارت میں 65 لاکھ اکاؤنٹس کو بند کردیا ہے، یہ پابندی واٹس ایپ کو بھارتی صارفین کی جانب سے موصول شکایات کے بعد عمل میں لائی گئی ہے۔
بھارتی حکومت کی جانب سے سوشل میڈیا صارفین کے خدشات کو دور کرنے کی ایک شکایاتی کمیٹی(GAC) کمیٹی قائم کی گئی ہے جس کا مقصد سوشل میڈیا صارفین کے انٹرنیٹ پر شیئر کیے گئے مواد اور اس سے متعلقہ مسائل کو حل کرنا ہے، بھارتی حکام اس حوالے سے ماہانہ رپورٹ بھی شائع کرتے ہیں۔
پاکستانی پاسپورٹ پر بغیر ویزہ کتنے ممالک کا سفر ممکن؟
زی نیوز کی ایک رپورٹ کے مطابق، یہ کارروائی نئے آئی ٹی رولز 2021 کے مطابق تھی۔ مجموعی طور پر ممنوعہ اکاؤنٹس میں سے 2.42 ملین کو ملک سے کسی بھی صارف کی رپورٹس موصول ہونے سے پہلے ہی فعال طور پر پابندی لگا دی گئی تھی۔
بھارتی میڈیا کے مطابق مذکورہ اکاؤنٹس میں سے 24 لاکھ اکاؤنٹس کو صارفین کی جانب سے موصول شکایت کے بغیر ہی بند کردیا گیا، مئی کے مہینے میں واٹس ایپ کو بھارتی صارفین کی جانب سے اکاؤنٹس بند کرنے سمیت 3912 شکایات موصول ہوئی تھیں جن میں سے 297 پرکارروائی کی گئی۔
سوشل میڈیا پرمنفی پروپیگنڈا پھیلانے والی 19ویب سائٹس کی نشاندہی
واضح رہے کہ واٹس ایپ کی جانب سے بھارت میں ایک ماہ کے دوران لاکھوں اکاؤنٹس پر پابندی کا یہ پہلا موقع نہیں ہے اس سے قبل اپریل میں بھی واٹس ایپ نے بھارت میں 74 لاکھ اکاؤنٹس بند کیے تھے،بھارت میں واٹس ایپ صارفین کی تعداد 50 کروڑ سے زائد ہے، اس لحاظ سے واٹس ایپ بھارت کی ایک مقبول ترین میسیجنگ/کالنگ ایپ ہے۔
