مغلپورہ میں 7 سالہ بچی کے ساتھ جنسی زیادتی کرنیوالا ملزم گرفتار

لاہور: مغل پورہ میں پولیس نے 7 سالہ بچی کے ساتھ جنسی زیادتی کرنے والے ملزم کو گرفتار کرلیا-

باغی ٹی وی : ترجمان پولیس کے مطابق ایس پی سول لائنز ڈاکٹر عبدالحنان نے 15 پر آنے والی کال پر نوٹس لیتے ہوئے فوری کارروائی کا حکم دیا جس پر ایس ایچ او تھانہ مغلپورہ نے اپنی ٹیم کے ہمراہ بروقت کارروائی کرتے ہوئے کم سن بچی سے زیادتی کے ملزم طیب کو موقع پر گرفتار کرلیا،ملزم بچی کا کزن ہے جس نے معصوم بچی کو اپنی ہوس کا نشانہ بنانے کا اعتراف کرلیا ہے۔

پولیس کے مطابق ملزم کے خلاف تھانہ مغلپورہ میں مقدمہ درج کرکے مزید تفتیش کے لیے حوالہ انویسٹی گیشن ونگ کر دیا گیا ہے، ایس پی سول لائنز ڈاکٹر عبدالحنان نے بروقت کارروائی کرتے ہوئے ملزم کی گرفتاری پر ایس ایچ او تھانہ مغلپورہ نسیم خان اور پولیس ٹیم کو شاباش دی۔

ڈی آئی جی آپریشنز لاہور محمد فیصل کامران نے کہا ہے کہ زناکاری کرنے والے کسی صورت پولیس سے بچ نہ سکیں گے ، جرائم پیشہ افراد کے خلاف بلا امتیاز کارروائیاں جاری رہیں گی۔