لاہور : سپریم کورٹ بار کے سالانہ انتخابات کے لیے پولنگ کا عمل جاری ہے-
باغی ٹی وی :لاہور میں سپریم کورٹ بار کے سالانہ انتخابات کے لیے پولنگ کا عمل 15 منٹ تاخیر سے صبح ساڑھے 8 بجے شروع ہوا جو شام 5 بجے تک جاری رہے گا،سپریم کورٹ بار کے انتخابات کے لیے 5 نشستوں پر 17 امیدوار مدمقابل ہیں، ان انتخابات کے لیے عاصمہ جہانگیر گروپ اور حامد خان گروپ میں مقابلہ ہے۔
عاصمہ جہانگیر گروپ کی طرف سے صدر کی نشست پر میاں محمد رؤف عطا اور حامد خان گروپ سے منیر احمد خان کاکڑ کے درمیان مقابلہ ہو رہا ہے جبکہ سیکرٹری کی سیٹ پر حامد خان گروپ سے سلمان منصور اور عاصمہ جہانگیر گروپ کےملک زاہد اسلم کے درمیان مقابلہ ہے۔
اسی طرح نائب صدر پنجاب کی سیٹ پر رانا بختیار اور رانا غلام سرور کے درمیان مقابلہ ہے جبکہ ایڈیشنل سیکرٹری کی سیٹ پر محمد اورنگزیب اور راجہ زبیر حسین مقابلے میں ہیں، اسی طرح فنانس سیکرٹری کی سیٹ پر حامد خان گروپ سے اورنگزیب میر اور عاصمہ جہانگیر گروپ کے چوہدری تنویر مدمقابل ہیں۔
سپریم کورٹ بار کے الیکشن میں 4 ہزار 21 وکلا اپنا حق رائے دہی استعمال کریں گے، سب سے زیادہ ایک ہزار 414 ووٹرز کا تعلق لاہور سے ہے۔
