وزیر اطلاعات شرجیل میمن نے 9 مئی کے واقعات کا ماسٹر مائنڈ بانی پی ٹی آئی کو قرار دے دیا۔
باغی ٹی وی کے مطابق سندھ کے وزیر اطلاعات شرجیل میمن نے 9 مئی کے واقعات کو بانی پی ٹی آئی کی منصوبہ بندی قرار دیتے ہوئے کہا کہ اس واقعے کے پیچھے بانی پی ٹی آئی ہی تھا۔ پی ٹی آئی نے ملک کو نقصان پہنچانے کی ہر ممکن کوشش کی اور 9 مئی کو قومی سلامتی کے اداروں پر حملہ کیا۔ جب بانی پی ٹی آئی کو 14 سال کی سزا ہوئی تو کسی نے احتجاج نہیں کیا لیکن ان کی ہدایت پر ان کی پارٹی کے لوگ شرپسندی کرتے ہیں۔ بانی کے کہنے پر ان کے دور میں رہنماؤں کی گرفتاریاں ہوئیں اور انہوں نے چن چن کر اپوزیشن رہنماؤں کو نشانہ بنایا۔
وزیر اطلاعات سندھ نے ثاقب نثار پر بھی تنقید کرتے ہوئے کہا کہ انہوں نے ڈیم فنڈ کے نام پر لوگوں کو بے وقوف بنایا اور آلہ کار بن کر رہنماؤں کی کردار کشی کی۔ پی ٹی آئی ملک میں انتشار پھیلانے کی کوشش کرتی ہے اور اس نے آئین کی دھجیاں اڑانے میں بھی کوئی کسر نہیں چھوڑی۔دوسری جانب شرجیل میمن نے حیدرآباد میں ٹریفک کے مسائل پر انتظامیہ سے بات چیت کرنے کا بھی ذکر کیا۔ انہوں نے کہا کہ گاڑیوں کی فٹنس کو یقینی بنایا جا رہا ہے اور ٹنڈو جام میں ٹریفک قوانین پر عملدرآمد یقینی بنایا جائے گا۔
ورلڈ بینک کے وفد کے سندھ کے مختلف علاقوں کے دورے کا ذکر کرتے ہوئے شرجیل میمن نے بتایا کہ وفد نے صوبائی حکومت کے منصوبوں کی تعریف کی ہے۔انہوں نے بتایا کہ سندھ میں ایک بڑا ہاؤسنگ پروجیکٹ بننے جا رہا ہے جس کے تحت 21 لاکھ بے گھر افراد کو گھر بنا کر دیئے جائیں گے۔ اس ہاؤسنگ پروجیکٹ کا کریڈٹ صدر آصف علی زرداری اور بلاول بھٹو کو جاتا ہے۔وزیر اطلاعات نے مزید کہا کہ سندھ میں ساڑھے 7 لاکھ گھروں کی تعمیر مکمل ہو چکی ہے اور بے گھر افراد کو گھر دینے کے لیے ریکارڈ بنانے کا کام جاری ہے۔2022 کے سیلاب کی تباہی کا ذکر کرتے ہوئے کہا کہ کروڑوں سیلاب متاثرین کو بھرپور ریلیف فراہم کیا گیا۔ ملک کے عوام کو سندھ حکومت کے کارناموں پر فخر ہونا چاہیے کیونکہ صوبائی حکومت نے ہر چیلنج کا مقابلہ کرتے ہوئے عوام کی خدمت کی ہے۔
امریکہ پھر پاکستان کے قریب، بڑی پیش رفت,آرمی چیف کا دورہ برطانیہ، بڑی سفارتی فتح!
معروف مذہبی و سماجی رہنما محمد یحییٰ مجاہد کی اہلیہ محترمہ کی وفات،نماز جنازہ ادا
