نو محرم کے جلوس، سیکورٹی سخت، کئی شہروں میں موبائل سروس بند

باغی ٹی وی کی رپورٹ کے مطابق یوم عاشورہ کے موقع پر پنجاب کے متعدد اضلاع میں موبائل سروس بند کر دی گئی

پنجاب کے صوبائی دارالحکومت لاہور میں بھی موبائل سروس بند ہے،پنجاب کے اضلاع اوکاڑہ، ساہیوال، خانیوال، ملتان، فیصل آباد، گجرات، راولپنڈی اور دیگر اضلاع میں موبائل سروس بند کر دی گئی، موبائل سروس شام 7 بجے تک بند رہے گی۔

پنجاب کے صوبائی دارالحکومت لاہور میں نو محرم کا مرکزی جلوس پانڈو اسٹریٹ سے شروع ہوا ہے اور روایتی راستوں سے ہوتا ہوا خیمہ سادات پر اختتام پذیر ہو گا۔ کراچی میں مرکزی جلوس نشتر پارک سے شروع ہو کر امام بارگاہ حسینیان ایرانیان کھارا در پر ختم ہو گا جبکہ اسلام آباد اور پشاور سمیت دیگر شہروں میں بھی مجالس اور جلوسوں کا اہتمام کیا گیا ہے۔

نویں محرم الحرام کے جلوسوں کی سیکیورٹی کے لیے سخت حفاظتی انتظامات کیے گئے ہیں جبکہ جلوس کے مرکزی راستوں کے اطراف کی گلیوں اور سڑکوں کو رکاوٹیں اور ناکے لگا کر بند کر دیا گیا ہے۔ جلوس کے راستوں پر کے اطراف عمارتوں کی چھتوں پر بھی پولیس اہلکار تعینات ہیں۔

ملتان میں نو محرم الحرام کے سلسلے میں مختلف امام بارگاہوں سے 81 جلوس برآمد ہونگے۔ 81 جلوسوں میں سے 9 ماتمی جلوس جبکہ 166 مجالس میں سے 35 انتہائی حساس ہیں جن میں ممتازآباد کا مرکزی ماتمی جلوس بھی شامل ہے جو نماز ظہر کی آذان ہونے کیساتھ ہی امام بارگاہ ممتازآباد سے برآمد ہو گا جس میں شرکت کیلیے جنوبی پنجاب کے مختلف اضلاع سے بھی عزادار ملتان پہنچ گئے۔

جلوس اپنے روایتی راستے ممتازآباد مارکیٹ، چوک بی سی جی اور قدیمی گراونڈ سے ہوتا ہوا دوبارہ امام بارگاہ ممتازآباد میں ہی اختتام پزیر ہو گا جس کی سیکورٹی کیلیے پولیس نے کنٹرول روم قائم کر کے 2464 اہلکاروں کو بھی تعینات کر دیا ہے جبکہ جلوس کی حساسیت کے باعث وقتا فوقتا فضائی نگرانی کی جارہی ہے اور اسی سلسلے میں پاک فوج کی تین اور رینجرز کی پانچ کمپنیوں کو بھی ریزو رکھا گیا ہے