ایک اور جمعہ کو عام تعطیل کا اعلان، طلبا خوش ہو گئے

ایک اور جمعہ کو عام تعطیل کا اعلان، طلبا خوش ہو گئے

باغی ٹی وی کی رپورٹ کے مطابق محکمہ اسکولز اینڈ ایجوکیشن پنجاب نےکل چھٹی کا اعلان کردیا،اسموگ کے باعث لاہور ،فیصل آباداور گوجرانوالہ میں اسکول بند رہیں گے ,کل بروز جمعہ  کو صوبائی دارالحکومت لاہور میں تمام سرکاری و پرائیویٹ تعلیمی ادارے بند رہیں گے.

سکولوں میں تعطیل کا فیصلہ پنجاب کے صوبائی وزیر تعلیم پنجاب مراد راس کی زیر صدرات اجلاس میں ہوا ،اجلاس میں فیصلہ کیا گیا کہ محکمہ سکول ایجوکیشن کی جانب سے کئے گئے اعلان کے مطابق کل  لاہور شہر کے تمام سرکاری اور نجی سکول بند رہیں گے۔

سکولوں کی چھٹی کا اعلان فیصل آباد ،گوجرانوالہ کے لئے بھی کیا گیا ہے

وزیراعلیٰ پنجاب سردار عثمان بزدارنے لاہور اور گرد و نواح میں سموگ میں اچانک اضافے پر گہری تشویش کا اظہارکرتے ہوئے کہا ہے کہ محکمہ ماحولیات، انتظامیہ اور متعلقہ ادارے سموگ کے حوالے سے ہمہ وقت چوکس رہیں -سموگ کے حوالے سے احتیاطی تدابیر کے لئے عوام میں شعور بیدار کرنے کے لئے موثر آگاہی مہم چلائی جائے-

انہوں نے کہا کہ سموگ میں اچانک اضافے سے شہریوں کو مشکلات کا سامنا ہے -شہریوں کی مشکلات کے ازالے کے لئے متعلقہ محکمے فوری اقدامات اٹھائیں – وزیر اعلی نے کہا کہ محکمہ زراعت فصلوں کی باقیات کو جلانے پر پابندی پر سختی سے عملدرآمد کرائے اور آلودگی پھیلانے والی صنعتوں کے خلاف قواعد و ضوابط کے تحت کارروائی کی جائے۔

وزیراعلیٰ نے ٹائر جلانے پر پابندی پر سختی سے عملدرآمد یقینی بنانے کاحکم دیتے ہوئے کہا کہ متعلقہ اداروں کو شہریوں کی مشکلات دور کرنے کے لئے فعال اور متحرک انداز میں کام کرنا ہوگا۔

قبل ازیں حکومت نے چھ نومبر اور چودہ نومبر کو بھی سموگ کی وجہ سے سکولوں‌ میں چھٹی کا اعلان کیا تھا