کورکمانڈر حملہ کیس، ملزمان کی اپیل پر سندھ ہائیکورٹ نے سنایا بڑا فیصلہ

کورکمانڈر حملہ کیس، ملزمان کی اپیل پر سندھ ہائیکورٹ نے سنایا بڑا فیصلہ
باغی ٹی وی کی رپورٹ کے مطابق کورکمانڈر حملہ کیس کا عدالت نے فیصلہ سنا دیا، عدالت نے ملزمان کی اپیل مسترد کر دی اور 9 ملزمان کی سزا برقرار رکھی. ملزمان نے سندھ ہائیکورٹ میں اپیل دائر کر رکھی تھی، ملزمان نے کورکمانڈر کراچی پر حملہ کیا تھا.

پولیس کے مطابق مذکورہ دہشت گردوں نے 10جون 2004 کو کراچی کے علاقے کلفٹن پل پر کور کمانڈر کراچی کے قافلے پر حملہ کیا تھا ۔حملے میں کورکمانڈراحسن سلیم حیات محفوظ رہے تھے جبکہ چھ جوان شہید ہوگئے تھے ۔ دہشت گردوں کے اس حملے میں نذیر احمد سمیت تین پولیس اہلکار بھی شہید ہوئے تھے۔

انسداد دہشت گردی کی خصوصی عدالت نے کالعدم تنظیم جند اللہ سے تعلق رکھنے والے دہشت گرد عطا الرحمان کو اس کے گیارہ ساتھیوں سمیت سزا ئے موت سنائی تھی۔ ملزمان میں عطاالرحمن، شہزاد باجوہ، دانش امام، یعقوب سعید خان، خرم سیف اللہ، عزیز احمد، نجیب اللہ، شہزاد مختار، راؤ خالد، شعیب صدیقی اور محمد خالد شامل ہیں۔

سنہ 2006 میں عدالت نے قتل کے الزام میں ملزمان کو سزائے موت، بم دھماکے کے الزام میں عمر قید اور جائیداد ضبط کرنے، کورکمانڈر پر حملے کے الزام میں 14 برس قید اور 50 ہزار جرمانہ اور عوامی املاک کو نقصان پہنچانے کے الزام میں ایک ایک لاکھ روپے جرمانے کی سزا سنائی تھی۔ آج سندھ ہائیکورٹ نے ملزمان کی اپیل مسترد کر دی.