باغی ٹی وی کی رپورٹ کے مطابق کورونا وائرس کی نئی قسم پاکستان پہنچ گئی
سندھ میں 3مریضوں میں کورونا وائرس کے نئی قسم کی تصدیق ہوئی ہے،برطانیہ سے پاکستان پہنچنے والے مسافروں کو قرنطینہ کر دیا گیا ہے
برطانیہ سے آنے والے تین مسافروں میں کورونا وائرس کی نئی قسم کی موجودگی کی تصدیق محکمہ صحت سندھ کی جانب سے بھی کر دی گئی ہے ، چار دن قبل چھ مسافر براستہ دبئی برطانیہ سے کراچی پہنچے جن کے ٹیسٹ کروانے کیلئے سیمپلز لیے گئے تاہم اب ان کی رپورٹس سامنے آئی ہیں جن میں سے تین مسافروں میں کورونا وائرس کی نئی قسم کی تصدیق ہو گئی ہے ۔
ترجمان محکمہ صحت سندھ کے مطابق محکمہ صحت سندھ نے برطانیہ سے واپس آنے والے 12 افراد کے ٹیسٹ کیے تھے اور 12 میں 6 مریضوں کا کووڈ ٹیسٹ پازیٹو آیا،جینو ٹائپنگ سے پتہ چلا کہ 3 مریضوں میں نیا مہلک وائرس موجود ہے،مریضوں میں پایا جانے والا وائرس برطانیہ میں پائے جانے والے وائرس سے 95 فیصد مماثلت رکھتا ہے،سیمپلز کو جینو ٹائپنگ کے دوسرے مرحلے سے گزارا جائے گا۔
پاکستان نے برطانیہ سے براہ راست پروازیں معطل کر دی ہیں جس کے باعث یہ مسافر برطانیہ سے دبئی اور پھر کراچی پہنچے تھے ، ایئر پورٹ حکام نے ان کی ٹریول ہسٹری کو دیکھتے ہوئے سیمپلز لیے ، اب ایئر پورٹ حکام یقینی بنا رہے ہیں کہ برطانیہ کی ٹریول ہسٹری رکھنے والے ہر مسافر کے ٹیسٹ کیے جائیں ، تمام مسافروں کو سختی سے مانیٹر کیا جائے گا۔
ٹیسٹ کی رپورٹ مثبت آنے کے بعد حکومت سندھ نے تینوں افراد کی فیملیز سے بھی رابطہ کر لیاہے اور انہیں آگاہ کرنے کے بعد خاندان کے دیگر افراد کے ٹیسٹ کرنے کا بھی فیصلہ کیاہے ، تینوں افراد اپنے اپنے گھروں میں قرنطینہ ہیں ، دو افراد کے علاقوں میں سمارٹ لاک ڈاﺅن کی سہولت پہلے سے موجود ہے جبکہ تیسرے مسافر کے علاقے میں بھی سمارٹ لاک ڈاﺅن کا انتظام کیا جارہا ہے ۔
تینوں افراد کی حالت اس وقت خطرے سے باہر ہے اور وہ اپنے گھر میں ہی آئیسولیشن میں ہیں تاہم محکمہ صحت کی جانب سے ان کی نگرانی کی جارہی ہے اور ضرورت پڑنے پر ہسپتال منتقل کیا جائے گا
واضح رہے کہ برطانیہ میں کورونا کی ایک نئی قسم سامنے آچکی ہے جووائرس کی پہلے دریافت ہونیوالی قسم سے بھی زیادہ تیزی سے منتقل ہوتاہے اور کورونا کی سامنے آنیوالی یہ قسم پہلے وائرس سے زیادہ تبدیل ہو چکا ہے۔
