چونیاں : نبی کریم کے طریقو ں کو بھلا کر آج امت مسلمہ ذلیل و رسوا ہو رہی ہے-محمد افضل شاہین

باغی ٹی وی ،چونیاں ( نامہ نگار ) نبی کریم کے طریقو ں کو بھلا کر آج امت مسلمہ ذلیل و رسوا ہو رہی ہے۔ دنیاو آخرت میں کامیابی کیلئے نبی رحمت کی سیرت کو اپنا ہوگا۔ آپکی زندگی پوری دنیا کے انسانوں کے لئے مشعل راہ ہے۔ہمارے قول و فعل میں تضاد ہی معاشرے میں خرابی کی وجہ ہے۔ ان خیالات کا اظہار ماہر تعلیم محمد افضل شاہین نے طلبہ سے خطاب کرتے ہوئے کیا۔ انہوں نے کہا کہ عشق رسول کے خالی نعروں سے کام نہیں چلے گا بلکہ زندگی کے ہر شعبے میں عشق رسول کی جھلک نظر آنی چاہئے۔صبح سے شام تک ہم کتنی اللہ کی نافرمانیاں کرتے ہیں۔ اللہ ہم پر کتنا مہربان ہے ہمیں عارضی موت یعنی نیند کے بعد دوبارہ مہلت دے کر جگا دیتا ہے کہ شاید میرا بندہ توبہ کر لے۔جب نوجوان توبہ کرتا ہے تو اللہ آسمانوں پر چراغاں کرتا ہے کہ آج میرے بندے نے میرے ساتھ صلح کر لی۔ اللہ نے ہم پر کتنا بڑا احسان کیا ہے کہ ہمیں حضرت محمد کا امتی بنا کر بھیجا ہے۔اگر حقیقی معنوں میں ہم دنیا و آخرت میں نجات حاصل کرنا چاہتے ہیں۔تو ہمیں اللہ کے حکموں اور نبی آخر الزمان کے طریقوں پر من و عن عمل کرنا ہوگا۔نبی کی حرمت اور جان میں انتخاب کرنا پڑے تو ہمیں اپنی جان قربان کر کے نبی کی حرمت پر آنچ نہیں آنے دینی چاہئے۔اللہ اور اس کے فرشتے نبی پر دورد بھیجتے ہیں اس لئے ہمیں بھی نبی کریم پر درود و سلام روزانہ پڑھنا چاہئے۔درورد پڑھنے والے گناہ مٹائے جاتے ہیں اور نیکیاں بڑھائی جاتی ہیں۔