لانگ مارچ کے دوران کنٹینرکی ٹکر سے موٹرسائیکل سوار نوجوان جاں بحق

گوجرانوالا:پی ٹی آئی لانگ مارچ میں شامل کنٹینر کی ٹکر سے موٹر سائیکل سوار نوجوان جاں بحق ہوگیا۔

ریسکیو کے مطابق حادثہ پنڈی بائی پاس فلائی اوور کے قریب پیش آیا، عینی شاہدین نے بتایا کہ قافلے کی گاڑیاں عمران خان کے کنٹینر تک پہنچنے کے لیے جی ٹی روڈ کی مخالف سمت سے جا رہی تھیں کہ قافلے کے ساتھ چلنے والے کنٹینر نے موٹر سائیکل کو ٹکر ماردی۔

کنٹینر کی ٹکر کے نتیجے میں نوجوان سمیر نواز سر پر چوٹ لگنے سے موقع پر ہی جاں بحق جب کہ دوسرا نوجوان عثمان زخمی ہوگیا۔

نوجوان کی ہلاکت پر ورثاء نے عمران خان کےکنٹینر کے سامنےاحتجاج کیا، اس دوران ورثا اور پی ٹی آئی کارکنوں میں تلخ کلامی بھی ہوئی، بعد ازاں پولیس نے کنٹینر ڈرائیور کو گرفتار کرکے مقدمہ درج کرلیا۔

یاد رہے کہ اس سے پہلےگزشتہ جمعہ کے روز ٹرک سے گر کر زخمی ہونے والا پی ٹی آئی کا کارکن اسپتال میں دم توڑ گیا۔

سی سی ٹی وی کی فوٹیج میں دیکھا جا سکتا ہے کہ پی ٹی آئی کے بینر لگے ٹرک پر سوار حسن بلوچ نامی کارکن لانگ مارچ میں شرکت کے لیے جا ریا تھا کہ اچانک درخت کی شاخوں سے ٹکرانے سے نیچے گر کر شدید زخمی ہو گیا۔

حسن بلوچ کو فوری طور پر سروس اسپتال پہنچا دیا گیا جہاں وہ زخموں کی تاب نہ لاتے ہوئے گزشتہ روز جاں بحق ہو گیا۔49 سالہ حسن بلوچ سوتر منڈی اندرون لوہاری گیٹ کا رہائشی تھا جس کی تدفین کردی گئی۔