کراچی میں ڈینسو ہال کے قریب 4 منزلہ خستہ حال عمارت کی بالائی منزل گرگئی

کراچی:کراچی میں ڈینسو ہال کے قریب 4 منزلہ خستہ حال عمارت کی بالائی منزل گرگئی۔عمارت کے ملبے تلے دب کر کئی موٹرسائیکلوں کو نقصان پہنچا تاہم خوش قسمتی سے کوئی جانی نقصان نہیں ہوا۔

پولیس کے مطابق عمارت کے نیچے کئی دکانیں واقع ہیں جنہیں بند کروادیا گیا ہے۔

ادھر اس سے پہلے گلستان جوہر میں ایک اپارٹمنٹ میں دھماکے کے نتیجے میں دو خواتین سمیت 6 افراد زخمی ہوگئے۔

واقعہ راڈو بیکری کے قریب ایک اپارٹمنٹ میں پیش آیا جس میں زخمی ہونے والوں کو قریبی اسپتال منتقل کردیا گیا ہے۔

ایس ایس پی ایسٹ عبدالرحیم شیرازی کے مطابق بظاہر ایسا لگتا ہے دھماکہ گیس لیکیج کے باعث ہوا ہے تاہم بم ڈسپوزل اسکواڈ کی ٹیم جائے وقوعہ کا معائنہ کرکے شواہد اکٹھے کررہی ہے۔

ایس ایس پی شیرازی کا کہنا تھا کہ اس دھماکے میں بارودی مواد کے استعمال کے امکان کو رد نہیں کر سکتے تاہم بی ڈی ایس کی رپورٹ کے بعد اصل صورتحال سامنے آئے گی۔

اس سلسلے میں ابھی تک ابتدائی معلومات فراہم کی جارہی ہیں ، سیکورٹی اداروں کی طرف سے حتمی رپورٹ کچھ دیر بعد جاری کی جائے گی