آزاد کشمیر میں 31 سال بعد آج بلدیاتی انتخابات کیلئے پولنگ جاری ہے، آزاد کشمیر کے تین اضلاع میں پہلے مرحلے میں الیکشن ہو رہے ہیں
آزاد کشمیر میں بلدیاتی الیکشن کے لئے پولنگ کا عمل شروع ہوچکا جو بغیر کسی وقفے کے صبح 8 سے شام 5 بجے تک جاری رہے گی بلدیاتی انتخابات کو ریاست بھر میں تین مراحل میں کروایا جائے گا پہلے مرحلے میں آج مظفرآباد ڈویژن کے تین اضلاع میں انتخابات کروائے جا رہے ہیں
چیف الیکشن کمشنر کا کہنا ہے کہ پولنگ پرامن طریقے سے جاری ،ووٹرز کا جوش و خروش عام انتخابات سے زیادہ ہے پولنگ اسٹیشن پر خواتین کی بڑی تعداد دیکھ کر خوشی ہوئی
پولنگ کے دوران آزاد کشمیر کے صوبائی دارالحکومت مظفر آباد میں افسوسناک واقعہ پیش آیا ہے،حلقہ دو لچھراٹ کھتیلی پولنگ اسٹیشن پر لڑائی ہوئی اس دوران کلہاڑی کا استعمال کیا گیا،5افراد زخمی ہو گئے جنہیں طبی امداد کے لئے ہسپتال منتقل کر دیا گیا لڑائی تحریک انصاف اور آزاد امیدوار کے حامیوں کے درمیان ہوئی لڑائی کے بعد کھتیلی پولنگ اسٹیشن پر پولنگ کا عمل روک دیا گیا,پولیس کی بھاری نفری بھی موقع پر پہنچ گئی،
قبل ازیں مظفرآباد، نیلم اور ضلع جہلم ویلی میں انتخابات کے لئے تمام تیاریاں مکمل کر لی گئیں تھیں ، سیکرٹری الیکشن کمیشن کا کہنا تھا کہ مظفرآباد ڈویژن میں کل 2716 امیدوار مدمقابل ہونگے جن میں براہ راست الیکشن لڑنے والی 31 خواتین بھی شامل ہیں ، مظفرآباد ڈویژن میں بلدیاتی انتخابات کے لئے 1314 پولنگ سٹیشن اور 1884 پولنگ بوتھ قائم کر دیئے گئے ہیں، پریزائیڈنگ آفیسر،پولنگ آفیسرز سمیت 6966 اہلکار انتخابی فرائض کی انجام دہی کے لئے تعینات کئے گئے ہیں تاہم شدید سرد موسم کے باوجود ٹرن آؤٹ جنرل الیکشن سے زیادہ رہنے کی توقع ہے۔
سیاسی جماعتوں میں سے تحریک انصاف نے سب سے زیادہ 575 امیدواروں کو ٹکٹ جاری کئے، پیپلزپارٹی 545 کے ساتھ دوسرے مسلم لیگ ن 465 کے ساتھ تیسرے نمبر پر ہے، الیکشن کے موقع پر سکیورٹی کے سخت انتظامات کئے گئے ہیں، فوج بھی نگرانی کیلئے موجود ہے، 418 پولنگ سٹیشن حساس جبکہ 257 پولنگ سٹیشن کو انتہائی حساس قرار دیا گیا ہے
