ٹھٹھہ : ڈپٹی کمشنر کی زیرصدارت ریکروٹمنٹ کمیٹی کا اجلاس

ٹھٹھہ باغی ٹی وی(نامہ نگار راجہ قریشی)ڈپٹی کمشنر کی زیرصدارت ریکروٹمنٹ کمیٹی کا اجلاس
تفصیل کے مطابق چیئرمین ڈسٹرکٹ ریکروٹمنٹ کمیٹی و ڈپٹی کمشنر ٹھٹھہ غضنفر علی قادری کی زیر صدارت فوت شدگان کوٹہ پر عملدرآمد کے متعلق ان کے دفتر میں ڈسٹرکٹ ریکروٹمنٹ کمیٹی کا اجلاس منعقد ہوا۔ جس میں ڈسٹرکٹ ہیلتھ افسر ڈاکٹر محمد حنیف میمن ، ڈسٹرکٹ ایجوکیشن افسر (سیکنڈری) حضور بخش خاصخیلی ، ڈسٹرکٹ ایجوکیشن افسر ( پرائمری) محمد رحيم سومرو سمیت محکمہ بلڈنگس، ہائے وے، آبپاشی اور پبلک ہیلتھ انجینئرنگ کے افسران بھی موجود تھے۔ اس موقع پر ضلع ٹھٹھہ کے مختلف محکموں میں دوران ڈیوٹی فوت ہوجانے والے ملازمین کے ورثاء کو فوت شدگان کوٹہ کے تحت بھرتی کے سلسلے میں امیدواروں کے کاغذات اور تمام تر معاملات کا جائزہ لینے کے بعد امیدواران سے انٹرویوز بھی لئے گئے ۔ اس موقع پر ڈسٹرکٹ ریکروٹمنٹ کمیٹی کی جانب سے متفقہ رائے کے بعد محکمہ تعلیم کے 07 ، محکمہ صحت کے 02 ، محکمہ بلڈنگس کے 02، محکمہ ہائی وے کے 01، محکمہ ایریگیشن کے 03 جبکہ محکمہ پبلک ہیلتھ انجینئرنگ کے 01 امیدوار کی فوت شدگان کے کوٹہ پر ملازمت کی منظوری دی گئی۔ اس موقع پر چیئرمین ڈسٹرکٹ ریکروٹمنٹ کمیٹی و ڈپٹی کمشنر غضنفر علی قادری نے کہا کہ میرٹ کی بنیاد پر حقدار کو ان کا حق ضرور دیا جائے گا کسی بھی امیدوار کی حق تلفی ہر گز نہیں ہوگی –