ٹھٹہ ،باغی ٹی وی(نامہ نگار راجہ قریشی)23 جنوری 2023ء سے شروع ہونے والی انسداد پولیو مہم کو کامیاب بنانےکیلئے تمام وسائل بروئے کارلائے جائیں- ڈپٹی کمشنر
تفصیل کے مطابق ڈپٹی کمشنرٹھٹھہ غضنفر علی قادری نے محکمہ صحت سمیت دیگر تمام متعلقہ محکموں کے افسران اور این جی اوز کے نمائںدوں کو ہدایت کی کہ وہ 23- جنوری 2023ء سے شروع ہونے والی انسداد پولیو مہم کے دوران تمام وسائل بروئے کار لاتے ہوئے بہتر نتائج کے حصول کیلئے کوئی کسر نہ چھوڑیں۔ ان خیالات کا اظہار انہوں نے دربار ہال مکلی میں انسداد پولیو مہم کے انتظامات کا جائزہ لینے کے متعلق منعقدہ اجلاس کی صدارت کرتے ہوئے کیا۔ ڈپٹی کمشنر نے پولیس افسران کو ہدایت کی کہ وہ ٹرانزٹ پوائنٹس پر پولیو ٹیموں سے تعاون اور بھرپور مدد کریں تاکہ پبلک ٹرانسپورٹ پر سفر کرنے والے بچوں کو بھی آسانی سے قطرے پلائے جا سکیں۔ انہوں نے کہا کہ ضلع بھر میں پولیو ٹیموں کی موجودگی کو یقینی بنایا جائے تاکہ کوئی بھی بچہ پولیو کے قطرے پینے سے رہ نہ جائے۔ قبل ازیں پوليو کے متعلق این اسٹاپ افسر ڈاکٹر راجیش کمار نے گذشتہ مہم کے کارکردگی رپورٹ پیش کی اور اجلاس کو بریفنگ دیتے ہوئے بتایا کہ آئندہ مہم کے دوران ضلع کے 30 یونین کونسلز میں 5 سال تک عمر کے 2 لاکھ 31 ہزار 995 بچوں کو پولیو سے بچاء کے قطرے پلانے کا ہدف مقرر کیا گیا ہے جس کے لئے 717 گشتی ٹیمیں، 48 فکسڈ اور 55 ٹرانزسٹ پوائنٹس جبکہ 171 یو سی ایریا انچارچز اور 54 یو سی ایم اوز مقرر کئے گئے ہیں تاکہ مقررہ حدف حاصل کرکے مہم کو سو فیصد کامیاب بنایا جا سکے۔ اجلاس میں ایدیشنل ڈپٹی کمشنر ون ریاض حسین لغاری، ڈسٹرکٹ ہیلتھ آفیسر ڈاکٹر محمد حنیف میمن، ڈسٹرکٹ مینیجر یونیسف اعجاز جاکھرو، ڈاکٹر نظیر، پی پی ایچ آئی، مرف، ڈبلیو ایچ او مختلف این جی اوز کے نمائندوں، محکمہ تعلیم، پولیس، لوکل گورنمنٹ، انفارمیشن و دیگر حکام بھی موجود تھے۔ بعد ازیں ڈپٹی کمشنر غضنفر علی قادری اور ڈی ایچ او ڈاکٹر محمد حنیف میمن نے سول اسپتال مکلی میں بچوں کو پولیو کے قطرے پلاکر مہم کا باقائدہ افتتاح کیا اور عوام میں پولیو کے متعلق آگاہی اور شعور بیدار کرنے کے متعلق ریلی بھی نکالی گئی۔
23 جنوری سے شروع ہونے والی انسداد پولیو مہم کیلئے تمام وسائل بروئے کارلائے جائیں- ڈپٹی کمشنر
