کراچی: شاہراہ سے متصل صدر پولیس آفس کے قریب شدید فائرنگ

کراچی:کراچی کے علاقے صدر میں پولیس آفس (کے پی او) میں شدید فائرنگ اور دھماکے کی آوازیں سنی گئی ہیں، جس کے بعد علاقے میں خوف و ہراس پھیل گیا، پولیس و رینجرز کی بھاری نفری کے پی او پہنچ گئی، معاملے کی نوعیت جاننے کی کوشش کی جارہی ہے۔

ذرائع کے مطابق کراچی کے علاقے شاہراہ فیصل پر واقع صدر تھانے (کراچی پولیس آفس، ایڈیشنل آئی جی آفس) کے قریب شدید فائرنگ اور دھماکوں کی اطلاعات ملی ہیں، پورا علاقہ فائرنگ سے گونج اٹھا۔

نمائندہ سماء کے مطابق شہر بھر سے پولیس اور ریسکیو ٹیموں کو علاقے میں طلب کرلیا گیا ہے، فی الحال کسی جانی نقصان کی کوئی اطلاع نہیں ملی۔

رپورٹ کے مطابق کے پی او کی لائٹس بند کردی گئیں، دروازے بھی بند ہیں، کسی کو اندر جاتے یا باہر آتے نہیں دیکھا گیا، اطراف کی سڑکوں پر ٹریفک کی روانی روک دی گئی ہے، مزید فائرنگ اور دھماکوں کی آوازیں بھی سنی گئی ہیں۔

ذرائع کے مطابق حملہ آوروں کی جانب سے دستی بم پھینکے گئے ہیں تاہم کسی جانی نقصان کی اطلاع نہیں ملی۔
تازہ رپورٹ کے مطابق فائرنگ کا سلسلہ رک گیا، 4 سے 5 گولیاں چلنے کی آواز سنی گئی، پولیس کی جانب سے فی الحال واقعے سے متعلق تفصیلات جاری نہیں کی گئیں۔

کراچی پولیس آفس میں پولیس کے سینئر افسران اور اہلکاروں کی بھاری نفری موجود ہوتی ہے جبکہ یہ علاقہ انتہائی حساس سمجھا جاتا ہے۔

وزیراعلیٰ سندھ سید مراد علی شاہ نے ایڈیشنل آئی جیز کے دفتر پر مبینہ حملے کا نوٹس لے لیا ,وزیراعلیٰ سندھ نے مختلف ڈی آئی جیز کو اپنی زون سے ضروری پولیس فورس بھیجنے کی ہدایت کردی

وزیراعلیٰ سندھ نے کہا ہے کہ مجھے فوری طور پر ایڈیشنل آئی جی کے دفتر پر حملے کے ملزمان گرفتار چاہئیے، کراچی پولیس چیف کے دفتر پر حملہ کسی صورت قابل قبول نہیں، وزیراعلیٰ سندھ نے حکم دیا کہ مجھے تھوڑی دیر کے بعد متعلقہ افسر سے واقعے کی رپورٹ چاہئے