لاہور: ملک بھر میں شب معراج مذہبی عقیدت و احترام کے ساتھ منائی گئی-
باغی ٹی وی: ہر سال کی طرح امسال بھی فرزندان اسلام نے مذہبی جوش و جذبے اور عقیدت کے ساتھ شب معراج منا ئی،اہل ایمان نے خالق حقیقی کےحضورسجدہ ریز ہو کرکبریائی و بڑائی بیان کی، خصوصی نوافل ادا کیےدرود و وظائف کا اہتمام کیا اورذکر کی محافل میں شرکت کی مساجد اور خانقاہوں میں خصوصی تقاریب اورشب بیداری کا اہتمام کیاگیا تھا
اس موقع پر سیکیورٹی کے انتہائی سخت انتظامات کئےگئےجبکہ مساجد میں چراغاں اوردروس کا اہتمام بھی کیا گیا مسلمانوں نے اللہ تعالیٰ کے حضور پاکستان کی سلامتی، خوشحالی اور ترقی کی دعائیں بھی کیں-
علمائے کرام، مشائخ عظام اور مفتیان کرام نے شب معراج کے حوالے سے اپنے خصوصی خطاب میں اس رات کی فضیلت بیان کی، واقعہ معراج کا تفصیلی ذکر کیا اور نبی آخرالزماں ؐ کی حیات طیبہ کو اجاگر کیا۔
ماہ رجب کی 27 ویں شب پیغمبر اسلام حضرت محمد صلی اللہ علیہ و آلہ وسلم کو معراج کا شرف عطا کیا گیا، آپ صلی اللہ علیہ وسلم حضرت جبرائیل علیہ السلام کے ہمراہ براق پر سوار ہوکر مکہ مکرمہ سے مسجد اقصیٰ گئے اور وہاں تمام انبیائے کرام کی نماز کی امامت فرمائی۔
پھر آپ ﷺ کو آسمانوں میں اللہ تعالیٰ سے ملاقات کرانے کے لئے لے جایا گیا، وہاں رسول اکرمﷺ کو جنت اور دوزخ بھی دکھائی گئی۔ آپﷺ کی ملاقات مختلف انبیائے کرام سے بھی کرائی گئی، امت مسلمہ کے لیے معراج النبیﷺ کا سب سے بڑا تحفہ نماز ہے۔
