ممبئی: بالی ووڈ سُپر اسٹار شاہ رخ خان کی اہلیہ گوری خان کے خلاف جائیداد کی خریداری پر شکایت درج کروا دی گئی ہے،یہ ایف آئی آر گوری خان سمیت تین لوگوں کے خلاف درج کی گئی ہے۔
بھارتی میڈیا رپورٹ کے مطابق ممبئی کے ایک رہائشی جسونت شاہ نےالزام لگایا ہےکہ گوری خان جس کنسٹرکشن کمپنی کی برانڈ ایمبیسیڈر ہیں وہ 86 لاکھ روپے وصول کرنے کے باوجود فلیٹ کا قبضہ نہیں دے رہی ہے۔
شکایت میں کہا گیا ہے کہ جسونت شاہ نے فلیٹ برانڈ ایمبیسیڈر گوری خان سے متاثر ہو کر خریدا تھا۔
تلسیانی کنسٹرکشن کے چیف ایم ڈی انیل کمار اور ڈائریکٹر مہیش تلسیانی کے خلاف بھی ایف آئی آر درج کی گئی ہے۔ مذکورہ فلیٹ لکھنؤ کے سوشانت گالف سٹی میں تلسیانی گولڈ ویو میں واقع ہے۔
تلسیانی گروپ پر الزام ہے کہ رقم لینے کے بعد بھی اس نے فلیٹ کسی اور کو دے دیا۔ یہ معاملہ سوشانت گولف سٹی علاقہ کے تلسیانی گولف ویو میں فلیٹ کی خرید سے متعلق ہے-
گوری خان کے خلاف مقدمہ بھارتی پینل کوڈ کی دفعہ 409 اعتماد کی مجرمانہ خلاف ورزی کے تحت درج کیا گیا ہے۔
واضح رہے کہ گوری خان کی اپنی بھی ایک کمپنی ہے جس کا نام ’گوری خان ڈیزائنز‘ ہے وہ بی ٹاؤن کی بہترین انٹیریئر ڈیزائنرز میں سے ایک ہیں گوری نے بہت سی مشہور شخصیات کے گھر ڈیزائن کئے ہیں۔
