ایران پاکستان کے حالات پر ملکی سیاست دانوں کی کیا رائے ہے؟

ملیحہ لودھی نے کہا کہ پاکستان اور ایران کے درمیان کشیدگی سے داعش کو فائدہ ہوگا، پاکستان اور ایران کے تعلقات بہتری کی طرف جا رہے تھے، ایسے وقت میں ایران کے اس حملے پر حیرانی ہوئی، پاکستان اور ایران مل کر مذاکرات سے مسئلہ حل کر سکتے ہیں، ثالثی کی ضرورت نہیں، ضروری ہے کہ دونوں ممالک ایک دوسرے کے سیکیورٹی تحفظات کو سنیں۔جماعت اسلامی کے سینیٹر مشتاق احمد خان نے اس حوالے سے بات کرتے ہوئے کہا کہ یہ مسئلہ شروع ایران نے کیا ہے، ایران کی حرکت پر حیرت ہوئی اور صدمہ ہوا، ایران کے میزائل حملے میں دو معصوم بچے شہید ہوئے، پاکستان نے تمام عمل میں صبر اور ذمہ داری کا مظاہرہ کیا۔مشتاق احمد نے کہا کہ پاکستان ایران میں کشیدگی کا نقصان امت مسلمہ کو ہے، پاکستان ایران میں کشیدگی کا فائدہ اسرائیل بھارت امریکا کو ہوگا۔ جبکہ مسلم لیگ ن کے سینٹر مشاہد حسین نے کہا کہ پاکستان کے پاس ایران کو جواب دینے کے سوا کوئی راستہ نہیں تھا لیکن اب دونوں ممالک کو مذاکرات کا راستہ اپنانا چاہیے، مذاکرات نہیں کیے گئے تو اس کا فائدہ اسرائیل، بھارت اور امریکا اٹھائیں گے۔ انہوں نے کہا کہ ایران کے حملے نے غزہ کی صورتحال پر یکجہتی میں دراڑ ڈالی، ہمارا خیال تھا کہ شام تک شاید ایران اپنی حرکت پر معذرت کرلے گا، امریکا نے جب سلالہ پر حملہ کیا تو ہم نے مطالبہ کیا تھا کہ معافی مانگیں۔ جبکہ پی ٹی آئی کے سینٹر ولید اقبال نے کہا کہ پاکستان نے حساب چکا دیا، اب ہمیں امن کو مقدم رکھنا چاہیے، بین الاقوامی ایسے پلیئرز ہیں جو چاہیں گے پاکستان ایران میں کشیدگی رہے، ہمیں ان قوتوں کے ہاتھ میں نہیں کھیلنا چاہیے امن بحال رکھنا چاہیے، چین نے معاملے پر جس طرح بیان دیا ہے اس پر سوچنا چاہیے۔