تحریک انصاف کے امیدواروں اور کارکنوں کو ہراساں نہ کرنے کا حکم

اسلام آباد ہائیکورٹ نے تحریک انصاف کے امیدواروں اور کارکنوں کو ہراساں نہ کرنے کا حکم دے دیا

تحریک انصاف کے نامزدامیدواروں کی انتخابی مہم کی اجازت اور ہراساں کرنے سے روکنے کی درخواست پر اسلام ہائیکورٹ میں سماعت ہوئی، تحریک انصاف کے نامزد امیدواروں شعیب شاہین اور علی بخاری ایڈووکیٹ کی درخواستوں پر اسلام آباد ہائیکورٹ کے چیف جسٹس عامرفاروق نے سماعت کی،شعیب شاہین اورعلی بخاری کی درخواست پر اسلام آباد ہائیکورٹ کے چیف جسٹس عامرفاروق نے احکامات جاری کیے،دوران سماعت وکیل شعیب شاہین نے عدالت میں کہا کہ پولیس ہمارے سپورٹرز کو اٹھا کر کہتی ہے کہ پی ٹی آئی سے الگ ہوجاؤ، ہمارے لوگوں کو کہا جارہا ہے کہ کسی اورجماعت میں شامل ہوجاؤ، فون کالز کر کے کہتے ہیں کہ اگرجلسہ کیا تو آپ کے خلاف پرچہ ہوجائےگا

وکیل علی بخاری نے عدالت میں کہاکہ جو الیکشن مہم اورجلسے ہونے تھے وہ تو ہوگئے، آج آخری دن ہے، ہمارے پولنگ ایجنٹس کو کالز کرکے ڈرایا جارہا ہے،شعیب شاہین نے کہا کہ اگر اسلام آباد کی ماڈل پولیس یہ طرزعمل اختیار کرے گی تو پھر کیا امیج جائےگا؟ چیف جسٹس اسلام آباد ہائیکورٹ نے ریمارکس دیتے ہوئے کہا کہ چھوٹا سا اسلام آباد ہے یہاں آپ کارروائی کیوں نہیں کر سکتے؟ دانستہ طور پر لوگوں کو اٹھانا بالکل بھی مناسب بات نہیں ہے،آپ ذمہ دار افسر ہیں اس لیے آپ کو طلب کیا ہےدوسری صورت میں ہم آئی جی اور سیکرٹری داخلہ کو طلب کریں گے۔الیکشن کمیشن نے صاف اور شفاف انتخابات کرانے ہیں،آپ ان تمام چیزوں کو اپنے اختیارات کے تحت کیوں نہیں دیکھ رہے؟