کراچی: محکمہ موسمیات نے چند روز میں سندھ کے مختلف شہروں میں بارش کی پیشگوئی کی ہے۔
باغی ٹی وی: محکمہ موسمیات کے مطابق چند روز میں جامشورو ، دادو ،لاڑکانہ ، قمبر شہداد کوٹ میں بارش کا امکان ہے جب کہ کراچی میں آج اور کل کے دوران مطلع جزوی طور پر ابر آلود رہنے کا امکان ہے، مغربی ہواؤں کا سلسلہ آج بلوچستان میں داخل ہونے کا امکان ہے جس کے باعث آج شام سے 10 مارچ کے دوران بلوچستان میں گرج چمک کےساتھ بارش برس سکتی ہے، اس کے علاوہ تربت،کیچ، جیونی، اوڑمارہ، پسنی، لسبیلہ، آواران، قلات اور دیگرعلاقوں میں بھی بارش کا امکان ہے۔
دوسری جانب دبئی سمیت متحدہ عرب امارات کی مختلف ریاستوں میں موسلا دھار بارش نے جل تھل ایک کردیا، عرب میڈیا کے مطابق ہفتے کی صبح دبئی ،ابو ظبی، فجیریا اور دیگر ریاستوں میں گرج چمک کے ساتھ موسلا دھار بارش ہوئی، دبئی کے مختلف علاقوں میں طوفانی بارش کے باعث سڑکیں زیر آب آگئیں اور ٹریفک کی روانی متاثر ہوئی۔
العین، عجمان اور فجیرہ سمیت دیگر علاقوں میں بھی بادل کھل کر برسے، طوفانی بارش سے معمولات زندگی متاثر ہوئے محکمہ موسمیات نے شارجہ ، دبئی ، عجمان ، راس الخیمہ ، العین اور فجیرہ میں شدید بارشوں کے خدشے کے پیش نظر الرٹ جاری کرتے ہوئے لوگوں کو احتیاط برتنے کی ہدایت کی ہے۔
