اسلام آباد: دفتر خارجہ کا کہنا ہے کہ پاکستان داسو حملے کی مختلف زاویوں سے تحقیقات میں مصروف ہے اور تحقیقات مکمل ہونے کے بعد باقاعدہ آگاہ کیا جائے گا –
باغی ٹی وی : ترجمان دفتر خارجہ ممتاز زہرہ بلوچ نے پریس بریفنگ میں کہا ہے کہ پاکستان کسی دہشت گرد جماعت ٹی ٹی پی سے مذاکرات نہیں کر رہا،پاکستان نے دہشت گردی کے واقعات میں ملوث دہشت گردوں کی افغانستان میں موجودگی پر افغان عبوری حکومت کو آگاہ کیا ہے، افغان حکام سے توقع رکھتے ہیں کہ وہ کالعدم ٹی ٹی پی کے خلاف کارروائی کریں گے-
ترجمان دفتر خارجہ کے مطابق وزیراعظم کے دورہ چین کی تاریخ کا اعلان نہیں کر سکتے، چینی انٹر ایجنسی کی سیکیورٹی کے وفد نے پاکستان کا دورہ کیا، دورے کا مقصد پاکستان میں چینی باشندوں و کمپنیوں کی حفاظت بہتر بنانا تھا، داسو حملے پر قانون نافذ کرنے والے ادارے تحقیقات کر رہے ہیں، جونہی تحقیقات مکمل ہوئیں میڈیا کو آگاہ کریں گے۔
ترجمان دفترخارجہ نے کہا کہ ایران میں حالیہ حملے کی سختی سے مذمت کرتے ہیں، پاکستان،ایران نےجنوری کےبعدتمام باہمی رابطہ چینلزکوبحال کرلیاہے دونوں ممالک میں تجارت کے شعبے میں گہرا تعاون ہے ، ایرانی صدر کے جلد دورے کی توقع ہے البتہ ابھی ایران کے صدر کے دورےکی حتمی تاریخ نہیں دے سکتے، ایران کا اعلیٰ سطح کا وفد اسلام آباد میں موجود ہے ۔
ترجمان دفتر خارجہ کا کہنا تھا کہ ہم غزہ میں جاری اسرائیلی مظالم کی مذمت کرتے ہیں، غزہ پر عالمی عدالت انصاف کے فیصلے پر عملدرآمد کیا جائے اور عالمی عدالت کا حکم نہ ماننے پر اسرائیل کا محاسبہ کیا جائے۔فلسطینیوں کو غذائی قلت کا سامنا ہے، غزہ میں انسانی حقوق کی پامالی عالمی برادری کےلیےلمحہ فکریہ ہے، اقوام متحدہ غزہ میں مظالم پر اسرائیل کو کٹہرے میں لائے، آئی سی جے کے غزہ سے متعلق فیصلے پر عملدرآمد کا مطالبہ کرتے ہیں۔
