سینئر ترین افسر حسن رضا خان کو قائم مقام آئی جی تعینات کیا جائے، چیف کمشنر کا مطالبہ

انسپکٹر جنرل (آئی جی) کی غیر موجودگی میں اسلام آباد پولیس کو انتظامی مشکلات کا سامنا ہے، اس بات کا اظہار چیف کمشنر آفس نے وزارت داخلہ کو لکھے خط میں کیا۔
نئے آئی جی اسلام آباد کی تعیناتی سے متعلق خط ایڈیشنل کمشنر رانا محمد وقاص کی جانب سے لکھا گیا، جس میں کہا گیا کہ نئے آئی جی کی تعیناتی کے بعد اکبر ناصر اپنے عہدے کا چارج چھوڑ چکے ہیں، نئے تعینات ہونے والے آئی جی علی ناصر رضوی نے تاحال عہدے کا چارج نہیں سنبھالا۔ خط میں کہا گیا کہ آئی جی کی غیر موجودگی میں اسلام آباد پولیس کو انتظامی مشکلات کا سامنا ہے، صورتحال کے پیش نظر سینئر ترین افسر حسن رضا خان کو قائم مقام آئی جی تعینات کیا جائے۔ خط کے متن میں کہا گیا کہ حسن رضا خان بطور ڈی آئی جی ہیڈ کوارٹرز اسلام آباد پولیس میں خدمات سر انجام دے رہے ہیں۔