اردو کی پہلی خاتون قوال شکیلہ بانو بھوپالی

جو شخص مدتوں مرے شیدائیوں میں تھا
آفت کے وقت وہ بھی تماشائیوں میں تھا

شکیلہ بانو بھوپالی

اردو کی پہلی خاتون قوال، صاحب دیوان شاعرہ، ادکارہ اور موسیقار 9 مئی 1942 کو پیدا ہوئیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

آغا نیاز مگسی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

اردو زبان و ادب اور فنون لطیفہ کی تاریخ میں شکیلہ بانو بھوپالی واحد خاتون ہیں جو بہ یک وقت اداکارہ ، شاعرہ، گلوکارہ، موسیقار اور قوال تھیں جن کی خداداد صلاحیتوں اور حسن و جمال کی دھوم ، شہرت اور مقبولت اتنی تھی کہ مخدوم محی الدین کو شکیلہ بانو کے بارے میں یہ شعر لکھنا پڑا

شہر میں دھوم ہے اک شعلہ نوا کی مخدوم
تذکرے رستوں میں چرچے ہیں پری خانوں میں

اپنے دور کی مشہور و معروف علمی، ادبی، فن موسیقی اور دلیپ کمار سمیت فلمی شخصیات بھی ان کی صلاحیتوں کے معترف اور متاثر تھیں۔ شکیلہ بانو کا ایک شعری مجموعہ ” اک غزل اور ” کے نام سے شائع ہو چکا ہے۔ وہ ایک صاحب دیوان شاعرہ تھیں ۔ بحیثیت موسیقار انہوں نے کئی فلمی و غیر فلمی غزلوں ، گیتوں اور نغموں کی دھنیں ترتیب دیں قوال کی حیثیت سے ان کا بہت بڑا مقام تھا جبکہ انہوں نے 26 اردو فلموں میں اداکاری کے جوہر دکھائے۔ شکیلہ کے خاندان کی کفالت کی ذمہ داری خود ان کے کاندھوں پہ تھی اپنے گھریلو حالات کے باعث وہ شادی بھی نہ کر سکیں ، 16 دسمبر2002 انتقال کر گئیں-

شکیلہ بانو کی شاعری سے انتخاب

وہ جو ہر دم مرے خیال میں ہے
جانے کس پردۂ جمال میں ہے

چاہتے ہو تو ٹوٹ کر چاہو
خود جواب آپ کے سوال میں ہے

ہاں مرا فن کمال کو پہونچا
زیست لیکن مری زوال میں ہے

فکر کیا سرخ رو ہو یا ٹوٹے
دل مرا ان کی دیکھ بھال میں ہے

کیا ضروری ہے ہم جواب ہی دیں
ایک تلوار چپ کی ڈھال میں ہے

ان کو فرصت کہاں جو یہ سوچیں
بانوؔ امسال کس وبال میں ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جو شخص مدتوں مرے شیدائیوں میں تھا
آفت کے وقت وہ بھی تماشائیوں میں تھا

اس کا علاج کوئی مسیحا نہ کر سکا
جو زخم میری روح کی گہرائیوں میں تھا

وہ تھے بہت قریب تو تھی گرمئ حیات
شعلہ ہجوم شوق کا پروائیوں میں تھا

کوئی بھی ساز ان کی تڑپ کو نہ پا سکا
وہ سوز وہ گداز جو شہنائیوں میں تھا

بزم تصورات میں یادوں کی روشنی
عالم عجیب رات کی تنہائیوں میں تھا

اس بزم میں چھڑی جو کبھی جاں دہی کی بات
اس دم ہمارا ذکر بھی سودائیوں میں تھا

کچھ وضع احتیاط سے بانوؔ تھے ہم بھی دور
کچھ دوستوں کا ہاتھ بھی رسوائیوں میں تھا

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
میری راتوں میں سیاہی کے سوا کچھ بھی نہیں
شہر میں کیسے نکلتے ہیں ستارے لکھنا

ہم سے اچھے تو پرندے ہیں کہ پر رکھتے ہیں
ہوں قفس میں بھی تو اڑنے کا ہنر رکھتے ہیں