اسپیکر پنجاب اسمبلی ملک محمد احمد خان نے کہا ہے کہ سابق ن لیگی رہنما محمد زبیر کی نواز شریف کی جنرل باوجوہ سے لندن ملاقات کی بات جھوٹی ہے۔
میڈیا سے بات کرتے ہوئے سپیکر پنجاب اسمبلی ملک احمد خان کاکہنا تھا کہ زبیر صاحب نے نواز شریف سے متعلق جو بات کی ہے اس کو مسترد کرتا ہوں، وہ ایسی بات کر گئے ہیں جس سے ان کو کافی الجھن آسکتی ہے،جنرل باجوہ کی نواز شریف سے ملاقات تو کیا بات چیت بھی نہیں ہوئی، محمد زبیر نے بے بنیاد بات کی ہے، اس کے قانونی نتائج ہوسکتے ہیں،محمد زبیر بتائیں کب ملاقات ہوئی، کب باجوہ یہاں سے گئے، وہ اس ملاقات کی تفصیلات سامنے لائیں، مجھے ان سے اس بات کی توقع نہیں تھی، پی ٹی آئی والوں نے کہا کہ محمد زبیر کی بات پر جوڈیشل کمیشن بننا چاہیے، جوڈیشل کمیشن پر جانے سے پہلے محمد زبیر بتائیں کہ کب یہ ملاقات ہوئی۔
ہمیں حکومت میں پیپلز پارٹی کی مکمل سپورٹ حاصل ہے، ملک احمد خان
ملک محمد احمد خان کا مزید کہنا تھا کہ جب بھی ملک کو خطرات ہوئے، پوری قوم یکجا ہوئی ہے، نیشنل ایکشن پلان منظور کیا گیا اور اس کےخاطر خواہ نتائج نکلے، دہشت گردی سے نارمل پروسیجر سے ہٹ کر نبرد آزما ہونا پڑتا ہے، آپ کا آج کے رویہ کا فیصلہ تاریخ کرے گی، آپریشن عزم استحکام کامیاب ہو گا، یہ قوم کی سلامتی اور بقاء کا معاملہ ہے، اسد قیصر کے پاس کہنے کو کچھ نہیں تھا، مجھے یقین ہے کہ مولانا فضل الرحمان اور علی محمد خان دلیل سے بات کر سکتے ہیں، عدلیہ کا ادارہ ایک باوقار ادارہ ہے، دیکھیں کس جماعت کے ساتھ کیا برتاؤ کیسے کیسے ہوتا گیا، ہم نے آئینی عہدوں پر پیپلز پارٹی کو سپورٹ کیا ہے، ہمیں حکومت میں پیپلز پارٹی کی مکمل سپورٹ حاصل ہے،
دوسری جانب تحریک انصاف کے سابق رہنما، سابق وفاقی وزیر، محمد زبیر کے بھائی اسد عمر کا کہنا ہے کہ محمد زبیر کو نواز شریف اور جنرل باجوہ کی ملاقاتوں کا علم تھا تو 2 سال پہلے کیوں نہیں بتایا؟۔
ن لیگی رہنما رانا ثناء اللہ کا کہنا ہے کہ محمد زبیر غلط کہہ رہے ہیں۔ جنرل باجوہ کی کوئی ملاقات میاں نواز شریف سے نہیں ہوئی۔ ان سے پوچھا جانا چاہیے کہ اسوقت جب ان سے پوچھا جاتا تھا تو وہ انکار کرتے تھے اور آج اندازوں سے شاید اگر مگر میں بات کررہے ہیں
واضح رہے کہ محمد زبیر نے دعویٰ کیا ہے کہ نواز شریف کی جنرل باجوہ سے ملاقات ہوئی تھی، مریم نواز نے ان ملاقاتوں کے حوالہ سے بات کرنے سے منع کیا تھا،تحریک عدم اعتماد سے صرف دو ماہ پہلے جنرل باجوہ اور نواز شریف کی ملاقات ہوئی
